Tsürangkong Range Naga Youth Front-i metetdaktsür

Mokokchung, November 20 (TYO): Assam nung mejangjatetba nisung kari tim mesüi ‘economic blockade’ yokba anema apusodang timtem lendong kar danga adokra Assam sorkari iba khuretji abentsü, ta Tsürangkong Range Naga Youth Front-i metetdaktsüogo.
Mejangjatetba nisung kar ajanga Nov 15, 2020 nungi tenzüka New Sonowal Assam nung ‘economic blockade’ yoka noktangba anema ibaji agiintsü asoshi Tsürangkong Range Naga Youth Front (TRNYF)-i Assam aser Nagaland government na prongla dangi Mokokchung Deputy Commissioner ajanga tezüluba agütsüogo, ta TRNYF tir, Bendangwati aser tezülur, Shiluyongdang nati sangdong ka nung metetdaktsü.
Iba tezüluba nungji TRNYF-i Assam o Nagaland sorkar na dang iba noktangbaji temenuba agi 20th Nov, 2020 anepdang 6:00 ako tashi nungbo agiintsüla aser artsü kenoji tekaratiba nung bentettsü asoshi takhangba agütsü, ta TRNYF-isa metetdaktsü.
Mokokchung district kübok aliba Tsürangkong Range ya ozü tetsü-teboui wazüka yutsüba li aser akhi mapang nungi benshia aruba artsüji kecha yimya nunga melenshitsü makok. Aji oda, Aosenden yimdak atalokbaji Assam o Nagaland na artsü keno dak sentakba maparen ka ama magitsüla, kechiyong ibaji alemli nungi ozü meyong li lir, anungji, ozü tetsü tebou temeten anema telemtetba agiba nung onoki kodanga hau masütsü, ta parnokisa metetdaktsüogo.
Anungji, ozü Naga nunger tetsü teboui wazüka toktsüba li ji onoki teti tepo akümtsü aser ibaji kümzüka ayutsü asoshi onoki mulungba ama inyaktsü, aser ozüngi memelai noktangba anema apusodang timtem lendong/tamataloktsü kar danga adokra, “Assam sorkari iba khuretji abentsü”, ta TRNYF-isa metetdaktsü.
Iba dak sentakba nung iba osangbeneri Mokokchung Deputy Commissioner, Limawabang Jamir den jembidang, ‘Assam-Nagaland artsü anasaji tetsübutepjibo alitsü akok saka tang tashibo tensa tia tamajungba mekümdaktsüi azüoka lir’, ta ashi.
‘Tekaratiba nung Mokokchung district administration o Jorhat administration na iba dak sentakba nung mensem ka akatsü tang tejembidak lir, anungji, iba mensem ajanga tangatettep kati arua iba keno yakta süngjemtsü imlar aser onokia ibai züoki ia agidar’, ta paisa shisem.