Karbi aser Naga kaketshirtem ajurutep

November 20, 2020 nü Khatkhati nung Karbi Students’ Association (KSA) aser Dimapur Naga Students’ Union (DNSU) tanishirtem ajurutepa senden amendang agiba noksa angur.

Dimapur, November 20 (TYO): November 20, 2020 nü Rains Hotel, Khatkhati nung Karbi Students’ Association (KSA) aser Dimapur Naga Students’ Union (DNSU) tsüngda senden ka menogo.
Senden nung kaketshir telok anaprongi Assam/ Nagaland sorkartem aser Karbi Anglong Autonomous Council dang arrtsü tebilemtsü tongti süa bilema inyaktsü atema mepishia metetdaktsü.
KSA aser DNSU-isa nisungtem dang pei ajangzüktsü mechi nung tensa meraksatsü atema amokmerenogo.
Iba senden ya odang ajurutepa amenba dang asünung bangzüng kecha meyanglu saka telok anaprongi Karbi aser Naga nunger tsüngda tesentaktep meraksatsü aser yimjung nung alitsü telemtetba agia liasü.