Tuensang nung motor cycle rally ayongzüka agi

Dimapur, Luchii/December 10 (TYO): Frontier Royal Enfield En-Blok (FREE) club den longjemer Sakhi-One Stop Centre & Mahila Shakti Kendra-i December 10 nü Parade Ground Tuensang Motor Cycle rally ka ayongzüka agiogo. Iba rally ya tetsürtem anema inyakba maparen dak sendakba nung tangazükba agütsütsü atema ayongzüka agiogo. Rally ya “Leave no one behind, end violence against women and girls” omen nung ajemdaker agi.
Tuensang, Deputy Commissioner Kumar Ramnikant IAS-i iba rally tenzüktsü. Sentong nung o jembiba mapang DC-i, asenoki aginüang taginü asen lokti nung tetsürtem anema inyakba mesamai lir aser iba dak sendakba nung tangazükba agütsütsüji kanga tongtibang, ta ashi. Paisa, club züngsemtem dang parnok aolen ajak iba osang prokshitsü mepeshi.
Sakhi One Stop Centre, district administrator Chulongla-i ashiba agi, kidang kibong nung mepetmesü adokba ya kibong tebilemtsü mesera yimya ka ama magitsüla saka iba ya ozüng alema inyakba maparen ka ama agitsüla. Laisa, tetsürtem anema inyakba maparentem agintsü atema kibok nungi tenzüktsüla aser kümzüka ayutsüla, ta ashi. Tetsürtem anema inyakba maparen agintsü atema osang prokshiba ya tanü tembanga mayutsüla saka maneni prokshia aotsüla, ta lai shisem.