Nagaland nung nisung ka dak Covid-19 tashidak putet

Dimapur, Aenjeti/January 28 (TYO): Nagaland nung tanü nisung ka dak Covid-19 tashidak putetba sullen tang tashi nung tashidak puteter 12,081 jungogo aser kasa mapang nung shiranger pongu anepogo. Tang tashidak agi tonger temang anepalu alir parnok 52 lir.

“Tanü Peren nung nisung ka dak tashidak putetogo,” ta Director of Health and Family Welfare, Dr. Denis Hangsing-i metetdaktsü.

Nagaland nung tang tashi nung nisung 11,801 bo anepatokogo. Tang tashi nung tashidak agi nisung 88 süogo aser shiranger 143 tanga statei anirogo, ta paisa ashi. Tashidak menar alirtem rongnung parnok 4,985 Traced Contacts, armed forces personnel 4,669, tanga state nungi arurtem 1,857 aser yakbang nung inyakertem 573 lir, ta Dr. Denis-i metetdaktsü.   Tang temang anepalua alirtem rongnung nisung 15 dak tashidak keta aliba temaitsü terara sayudar, nisung ka kanga mejungi shirangdar aser nisung 36 dak tashidak keta aliba temaitsü kecha mesayur, ta pai ashi.

Nagaland nung tang tashi nung sample 1,24,466 tendangogo.