Nagaland Assembly budget session tenzükogo

Kohima, February 12 (TYO): Hokolbar nungi tenzüka anogo 9 atema agitsü atema Nagaland Legislative Assembly indang Budget Session 2021-22 tenzükogo.
Tanü MLA tem, Assembly staff, tongti ketdangsürtem, Heads of Departments aser tang support staff ajak COVID-19 tendang. Ano, Assembly secretariat kishizüng nung thermal scanning aser hand-sanitizers yua lir.
Assembly session agidang COVID-19 SOPs sülen anidakba nisungtem amentsü renema lir.
Tanü session tenzüka Nagaland Governor R N Ravi-i o jembi aser Advisor Namri Nchang-i Governor onük atema motion of thanks benok aser Advisor H. Haiying-i ibaji nungit.
Senden nungsa Speaker Sharingain Longkumer aser Chief Minister Neiphiu Rio nati anir taoba India Tir Pranab Mukherjee, taoba Union Minister Ram Vilas Paswan, taoba Nagaland Governor Ashwani Kumar, taoba Nagaland Minister CM Chang, taoba Assam Chief Minister Tarun Gogoi, taoba Nagaland MLA Lungbe Meru aser taoba Chief Secretary Temjen Toy nunger asüba asoshi mangyimba osangtem lemsatepba den tetushi agütsü.
Honibar aser Deobar anogotem sodi agiba sülen Hombar nungi assembly session maneni tenzüktsü.
February 15, 2021 nungi question hours tenzüktsü aser iba session nungsa annual administrative reports, Government rules, Assembly Committee Reports, Government Bills benoka olemteptsü.
Tang agiba session nung public asoshi kanga rongdak nüngdakba onüktem- Naga yimten tebilemtsü aser power sector revenue indang jembitsü.
Senotsü tsütsü benoka jembiba onüktem rongnung 2020-2021 asoshi supplementary demands for grants adentsü aser CM Rio-i February 18 nü 2021-2022 atema Budget benoktsü.