C-Edge College nung Faculty & Staff Development sentong ka agi

Dimapur, Tsüklai/February 26 (TYO): C-Edge College nung February 26, 2021 nü Faculty & Staff Development Programme ka IQAC ajanga ayongzüka Kiremwati Chair ajanga sponsor süa liasü. Iba sentong nung mezüngbuba session nung tesayur aser staff tem dena liasü, kong Nokchachila, Assistant Professor of Sociology Department menden liasü.
Kaikho Loli, Assistant Professor of History Department ajanga sarasadema iba session ya tenzük aser C-Edge College indang Principal, Dr. Chubatola Aier-i taruru pela agizükba o jembia liasü.
Mezüng session nung tongti o jembir ya Kingdom Discipleship Ministry, New Delhi nungi Rev. Bendang Longkumer liasü aser pai Tsüngrem o nung mapang indoka liasü.
Paisa mapa inyakba tesem nung Khrista mezüng südaktsütsü ayongzük.
Political Science indang HoD, Viseno Kuotsu ajanga sentong tembanga jembiba mapang, Rev. Longkumer-i agiba session ajanga asenok Tsüngrem den tesendaktep yanglua mapa ajunga tenzüktsü nungdaker ta angatetdaktsüogo, ta ashi.
Tanüla temeshi nem len anidaktsüba ajanga shisaliok agütsür ka ama asenoki mapa tajungba inyaktettsü aser classroom environment melenshitettsü, ta ashi.
Iba sentong tanabuba session ya telok ana kuma lemsar omeb balala nung agia liasü. Teaching faculty tem “Education in Transition: Rethinking Offline and Blended Mode of Teaching and Learning” omen nung ajemdaker technical session agia liasü.
Tashidak wara ajanga shisaliok nung kongshiba nung ajemdaker teaching-learning process nung tesayurtem sempet ulushitsü atema iba sentong ya agia liasü.
Iba Faculty & Staff Development Programme nungya COVID-19 tashidak wara poktetba sülen tesayuba aser angazükba tsütsü maongka aser tebilemtsü ajurubatem indang sensaksem kaa liasü.
Omen nung ajemdaker iba sentong nung department balala ajanga PowerPoint presentation agüja liasü.
Online ajanga sayuba aser angazükba nung tajung aser tamajung alibatem indang Blended Teaching-Learning nung amendaker presentation agütsüba ajanga asadanga liasü.
Kasa mapang staff züngsemtem asoshia “Office Management and Work Ethics” omen nung ajemdaker technical session ka agi, kong Morung Express indang Director of News and Administration, Akangjungla shisalen sayur liasü.
Lai ashiba agi, mapa ya kanga tongtipang lir, kechiaser iba ya ajanga pei sasa pei peridaktsür, ochishia aayangtsü maongka angur, koba nisung ka ayak atema kanga tongtipang aser pela alitsü asoshi tamendak dak ka lir.
Wadang balala nung pei sempet tajungtiba agi tenzükba den külemi ochishiba, akumtsüpuba, bendanga agütsüba aser dangar tenüng masenba yimyatem ya kanga tongtipang lir, aser kati ka anepalutsüla, ta lai ashi.
Item ajunga ya sensaksemba aser mapa balala inyakba ajanga angazükdakja liasü. Iba session tembanga College indang Office Assistant, Mohan Rana-i sarasadema liasü.