Dimapur Airport nung ‘air cargo operation’ tenzüktsü

Dimapur, February 26 (TYO): Dimapur Airport nung air cargo operation facility tenzüktsü aser iba ajanga Nagaland nung aluyimertem kanga ajangzüktsü.
Air cargo operation facility ajanga aluyimertemi linük kübok tesem balalai mapang shitak nung aonsotsü aser nüngdakbatem belentettsü.
Dimapur Airport indang terminal building nungi domestic cargo operation inyaktsü atema Director General, Bureau of Civil Aviation Security, Ministry of Civil of Aviation, Govt of India-i molunga agizükogo.
“Ministry den kanga meranga jembia aruba sülen Dimapur Airport-i cargo operation tenzüktsü temelaba nguogo. Airport nung common user domestic cargo terminal yangluogo aser kobi melii ibaji lapoktsü” ta Airport Authority of India, Dimapur Airport Director, M Zhimo-i osangbener dang ashi.
“Tanga airport tem ama masü saka Dimapur Airport-i melamela raksaba agri & allied items nung temolung agütsütsü, kechiyong Nagaland-i agri sectors mapa inyaktsü lenmang sadema lir. Nisungtemi iba facility amshitsü aser state indang rongsenkettsüng jenjang tajungba kümdaktsütsü ayongzüker” ta Director, M Zhimo-isa metetdaktsü.
Sentong nung Agriculture Production Commissioner, Y Kikheto Sema-ia Nagaland nem agri & allied maparen inyaktsü moaja lir ta ashi.
“Asen state asoshi tebilemtsü kaji sobaliba nungi tekong lu ayimba ya ka lir anungji asenoki integrated settled farming merangtsüla” ta paisa ashi.
Nagaland state anguba sülen küm 57 tashi nung district ajak nung soil testing lab maliasü saka 2020 & 2021 tsüngda ibaji inyaktetogo. Tanabuba nung Ministry of Civil Aviation nungi security clearance nguogo, ta paisa ashi.
Iba sentong nung Commissioner & Secretary, Horticulture, Anenla T Sato, IAS-ia o jembidang Airport authority, Dimapur aser talisa Director, M. Zhimo dang pelaba metetdaktsü.
Sentong nung mendenji Director & Mission Director (MIDH) of Horticultue, R. Elithung Lotha liasü aser DGM Cargo NER, AAI tenüng nung Nazeer AS Basha, Director, AAI Dimapur Airport-i cargo operation indang SOPs metetdaktsü.