Nagaland nung World Consumer Rights Day amungtsü

Dimapur, Tsüklai/February 28 (TYO): Küm shia March 15 ya World Consumer Rights Day ama alima tesem ajunga nung amunger, aser Nagaland Voluntary Consumers’ Organisation (NVCO) ajanga Nagaland nunga World Consumer Rights Day ya hopta ana (March 2 – March 15, 2021) amungtsü, ta Nagaland Voluntary Consumers’ Organisation tir aser National Award for Consumer Protection sempet angusang Kezhokhoto Savi-i sangdong ka ajanga ashi.

Consumer International ya 1960 küm April 1 nü tenzük, koba alima tesem balala nungi consumer telok tem züngsem lir. Iba tentet nung linük 120 nungi züngsem telok 250 lir. Consumer International indang nükjidong ya consumer wazüka aser kumzüka ayutsü lir aser iba tentet indang office ya London, England nung amenoka lir aser regional office tem Latin America, Asia Pacific, Middle East aser Africa nung lir.

Taoba mapang Consumer International dang International Organisation of Consumers Union (IOCU) ta nüngja agüja liasü, koba Elizabeth Schadee ajanga tentet.

Ajisüaka World Consumer Rights Day yabo taoba US Tir John F Kennedy ajanga ajungmesor tentetba lir.

1962 küm March 15 nü Tir John F Kennedy-i consumer temeden indang jembishinütsü asoshi US Congress dangi shidi temeja ya yoka liasü. Iba sülen 1985 küm April ita United Nations ajanga consumer protection indang yimyatem aser ozüngtem agizüka liasü.

1983 küm World Consumer Rights Day ya munga liasü. Iba sülen World Consumer Rights Day ya küm shia March 15 nü mungyonga arur. Indian parliament nung kasa Bill ya agizük aser India tiri December 24 nü temelaba agüja Consumer Protection Act, 1986 ya mapa kuma inyaka aser amshia arur.

Iba Act nung aliba inyakyim ya aiben melenshia arur saka tang atemabo Consumer Protection Act, 1986 ya Consumer Protection Act, 2019 agi melenogo.

India nung World Consumer Rights Day ya Consumer Protection Act, 2019 nung ajemdaker taküm mezüngbuba amungtsü lir. Aser iba dak sendakba nung Nagaland Voluntary Consumers’ Organisation ajanga state sorkar dang Nagaland nung Consumer Protection Act, 2019 mapa kuma amshitsü asoshi tekeratiba nung temzüng-ozüng yanglutsü nenshia ashir, ta sangdong ajanga ashi.

World Consumer Rights Day 2021 ya “Tackling Plastic Pollution” omen nung ajemdaker

amungtsü, ta International Consumer ajanga sangdongogo, ta NVCO tir Savi-i ashi.

Iba anogomung ya ajanga alima tesem ajungalen nüburtemi tzü-mopung kumzüka ayutsü aser ajungkettsü asoshi yimya sübatsü. Taküm iba anogomung indang omen “Tackling Plastic Pollution” ya asen state aser talisa Kohima aser Dimapur asoshi kanga tapet aser tongtipang lir, anungji lokti tentet balala, sorkar department, arogo, tribal hoho temi pei akokba nung asen alidak plastic agi tzü-mopung menentsüba anema lungjemer raratsü ajungshir, ta Savi-i ashi.

Kasa mapang paisa district/ sub-division level consumer voluntary organizations dang iba sentong nung ajemdaker plastic amshiba ajemtsü aser asen meketa aliba ajunga wazüka ayutsü aser ajungkettsü ayongzüka liasü.