State kübok tesem asem nung kitsük-kirong lendong atalok

Dimapur, Metsüremi/March 02 (TYO): KBCA Komking, Noklak nung kitsük-kirong lendong adoka lir ta March 1, 2021 nikongdang 2:00 ako meta osang aruba sülen Fire Station Tuensang nung amenoka aliba Fire Personnel tem mi ya remseptsü asoshi ao. Fire Tenders den hadir tabensa bener mapang shidak nung oa mi remsepteta liasü. Fire team ajanga iba mi remseptsü asoshi mapang ghonda ka ser minute 30 agia liasü. Tang tashi iba mi tenzükba kuli monguteter aser iba lendong nung asü-amar shinga meliasü. Item mibener ya Duty Commander ASI Mziegwangteing-i anir oa liasü.

Maneni School of Agricultural Science and Rural Development, Nagaland University, Medziphema, Dimapur nung kitsük-kirong lendong adoka lir, ta March 01, 2021 nikongdang 1:48 ako nung angashiba sülen iba mi remseptsü asoshi Fire Station, Chümoukedima nungi Fire & Emergency Services team nungi oa liasü.

Iba kitsük-kirong lendong nung süngjang aser aonsotsü kar rongdoka liasü. Iba lendong atalokba kuli monguteter aser iba lendong nung asü-amar shinga meliasü. Mapang shidak nung mibener aruba ajanga mi tali kaoloka aoba nungi nokdangtet.

Mibenertem ya Duty Commander SI Kenyuyhun Kent lenisüba kübok liasü aser parnoki ghonda asem agia mi ya remseptet.

March 1, 2021 nikongdang 4:40 ako meta Meriema Village, Below New High Court, Kohima nung kitsük-kirong lendong adoka lir ta osang ka aruba sülen Fire Station, Kohima (North) nungi Fire & Emergency Services team ka mi ya remsepi ao.

Hadir tabensa bener mapang shidak nung oa mi remsepteta lendong tuluba ataloktsü aliba nungi kumzükteta liasü. Fire Team ajanga ghonda ana jungnüa agia iba mi ya remseptet aser tang tashi iba mi adokba kuli monguteter. Iba lendong nung asü-amaba meliasü aser response team ya Duty Commander SI Inaka lenisüba kübok oa liasü.