Global Naga Forum-i Myanmar nunger atema aria bilemtsür

Dimapur, March 2 (TYO): Alima tesem balala nung Global Naga Forum züngsemtemi Myanmar nung atalokba atema tebilemtsü khuret abenba metetdaktsüogo.
Myanmar nung mitkartemi democratic inyakyim agienba angudang temolung raksar aser jashir. Parnoki national election agiba madak tashiyim mapa inyaker aser political o public lennirtem tepuokdak yua lir. Tang police aser security forces-i public dak tashiyim mapang inyaker aser iba atema aria bilemtsür, ta Global Naga Forum, Oking-Kohima sangdong ka nung ashi.
Nübortemi mitkar tashi anema timi lungkak aitba angudang onok ajungmesor. Myanmar linük kübok tesem balala nung nisungtemi alizüng ka atema longjemba angudang teimla mesamar, ta parnokisa ashi.
Democracy nung amanger nisungtemi tentetba Naga nunger atema international forum ka ama onoki nübortem taginüba akhümtsübur. Nübortemi democracy ka tamendakdakji elections timi agiba lir ta ashiba nung onoki pusema nungiter aser iba ama tensa tamajung ka nung Myanmar nung aliba Naga nunger den külemi noktaker, ta Global Naga Forum-isa metetdaktsüogo.
“Alima lennirtemi Myanmar nung democracy bener arutsü atema mapa inyaktsü mepishir. Mitkartemi tai maketba civilian tem dak tashiyim mapa inyaker. Myanmar nungeri parnok shimtetba sorkar aginür anungji UN Security Council-i iba tatalokba bushisüngdangtsü aser aibelenertem merenshitsü imlar,” ta Global Naga Forum-isa ashi.