Seyochung jila nung sorkari tesem aika lapoktsüogo

Dimapur, Metsüremi/March 3 (TYO): Advisor, Urban Development & Municipal Affairs, Dr. Neikiesalie Nicky Kire-i, March 3 nü Kiphire District kübok Seyochung nung Town Council Hall ka semzüktsüogo.
Council Hall semzüktsüba sentong nung Dr. Neikiesalie-i, Seyochung temeket nung aliba nüburtem dang iba tesem terenlok temulundang yur tarutsü nung maongka tali bendenloktsü atema town council den teka amteper inyaktsü ajungshi.
Kasa mapang nung Geology & Mining, Soil & Water Resource, Chairman NSMDC Minister V.Kashiho Sangtam-i, March 3 nü Seyochung jila nung ‘Rural Marketing Complex’ tasen ka lapoktsüogo.
Iba complex nung Seyochung jila nung aliba lanur aser tetsür entrepreneurs temi shishilembatsü.
Sentong nung o jembiba mapang V. Kashiho Sangtam-i, iba complex ya mapang talangka nungi kanga nüngdaka aliba ka ta bilema liasü, kechiyong jila renlokyonga aoer anungji infrastructure den connectivity nüngdaker, ta ashi.
Maneni Minister of Health & Family Welfare, Department, S. Pangyu Phom-i kasa anogo Seyochung jila nung Community Health Centre ka lapoktsüogo.
CHC lapokba sentong nung pai, tang lapoktsüba centre ya nüburtem atema lir, anungji iba centre takok angutsü atema nüburtemi shilem agiba dak keta lir, ta ashi.