Meyipshia Luyimer

– C. Lima Ozüküm, Mongsenyimti

Tiatem madak tia aluyimertem

Teyanglur temoatsü yanglok

Shimtetogo mongpu ajak nung süsür

Talenba maten rem lanu kibur

Süngzü maliba süngdong ainer mesük

Ya atangji Tsüngremer sentong.

Longjen longa aliba mapang kü tembar

Memeteter küm süi ne den

Taküm shia soyimer meditemi

Milung ajemshia chi amen mesük

Kü lenyim wangwanga ameta kümdaktsür

Ya atangji Tsüngremer sentong.

Tsüngküm mapa nungnai arua nükmener

Tzünglu mepungi bu asemer

Metsüjang aka asoba ngua pelar

Kinü tanur mesüzüker mesük

Mulung saladaktsür ayip ajanger

Ya atangji Tsüngremer sentong.

Züsen ajak nung talubosa moatsür

Yongyim kata metoktsü awabanger

Melep mezünga wadang kokdaktsür

Meyipshia luyimer takokma nung dang

Kusümonga ala-ohshia metoktsür

Ya atangji Tsüngremer sentong.

Anü maluba lima ama wangshir

Süngtzü tanang agi ni mesür

Arishi peyong sünepa anir

Angaka oa yimlaba tesema

Ochishir kabu kodanga makonger

Ya atangji Tsüngremer sentong.