NDPP pur shisadokten senden amen

Dimapur, Metsüremi/March 04, 2021 (TYO): Brehostibarnü, Central Headquarters Chumukedima nung NDPP Central Office-i tongtibang lokti tentet aser committee den shisadokten senden ka ayonga agiogo, ta sangdong ka ajanga metetdaktsü.
Iba senden nung Dr. John Murry, Treasurer NDPP menden liasü. Chingwang Konyak-i, tarutsü anogotem nunga party tashiita inyaksangshitsü atema nübur den tesendaktep tajung ayutsü aser longjemer inyaksangshitsü asoshi party nung inyakertem ajungshiogo.
NDPP indang Secretary General, Abu Metha-ia Sorkar indang sentongtem metetdaktsü aser Party Manifesto indang tanga sentongtem ajangzüktettsü atema tasa tasen amshia maparen inyaksangshitsü asoshi pai party nung inyakertem ajungshia liasü.
Iba senden nung senior party lenirtem, Tongtibang tentet ajak nungi President aser Committee Convenor tem denogo, ta kasa sangdong nung shia lir.