LRD Director-i Zunheboto semdang

Kiphire, Rongchii/April 09, 2021 (TYO): Zunheboto District kübok yimtsüng balala nung teinyakdak aliba project tem reprangshimtsü mechi April 05 aser 06 nü Director of Land Resources Department, Renben Jami den Directorate ketdangsürtemi item yimtsüng semdangogo, ta sangdong ajanga metetdaktsü.
Team-i Ustomi, Natha Old, Surumi, Satami, Lukikhe, Khrimto, Rotomi aser Philimi yimtsüng tem semdanga liasü.
Item yimtsüng semdangba mapang, Renben-i, project balala takok ngua inyaktettsü asoshi Department den amalitepa aotsü aser nungittsü asoshi yimertem ayongzük.
Lemzüktsüba project balala takok ngua amenoktsü asoshi Department-i akok tashi yimertem nem teyari agütsütsü, ta pai ashi.
Tzü kümdanga amshitsü aser tzü bendena ayutsü indang tongtibang nung pai jembia liasü. Coffee project tem dak sendakba nung, Director-i ashiba agi, aluyimertem atema training tajung agütsütsü Department asalentong yangludar aser kati ka ajungshitepa nendak nendaka inyaktsü asoshi pai ajungshiogo.
Maneni, Director Renben den Deputy Director, LRD, Hekato Yeptho; SPC SLNA Cell, Inatoli Chishi aser technical staff, SLNA nunger dena liasü, ta kasa sangdong nung shia lir.