Tuensang & Kiphire DPDP senden agiogo

Tuensang, Rongchii/April 09, 2021 (TYO): Brehostibarnü (08.04.2021) DC Conference Hall nung Tuensang District Planning and Development Board (DPDB) senden agiogo. Iba senden nung DC aser Vice Chairman DPDB Tuensang, Kumar Ramnikant, IAS menden liasü.
Iba senden nung DPDB züngsemtemi, Sotokur EAC administrative circle nungi Chingmelen, Helipong aser Sipongsang yimtsüngtem Tuensang District administrative circle-i belentsü onük nung olemtep aser iba ya mapa küma inyaktsü atema sorkar dangi benoktsü telemtetba agi.
Aspirational Block Chessore atema CMO, EE (R&B), EE (Power), DAO (Agri), DHO (Horti), District Soil Conservation Officer, PD Land Resource, DEO(Education), DFO(Forest),PD RD, DWO aser President YTC densema District Level Committee tentettsüogo.
Mount Sinai School Longkhim nung class V nungi class VIII tashi bendenloktsü, Imlong Theological College Campus tsüngda lenmang tajungba yanglushitsü aser GHSS Thangjam nung badminton court yanglutsü asoshi senotsü teyari agütsütsü asoshi board olemtepogo.
Iba den külemi, Chessore yimtsüng nung Grace Ministry Welfare Society indang registration atema mapatong nung sensaksem aser iba Society register asütsü asoshi sorkar dangi yoktsü telok bangjemtep.
Board-isa iba senden nung State Bank of India indang General Manager jaok aser district nung bank maparen tsütsü nüburtem mepetmesü/timtem ajuruba aser akok tashi service tajungtiba agütsütsü asoshi olemtepa liasü.
Mokokchung aser Tuensang tsüngda teinyakdak aliba maparen atema sensaksem agitsü asoshi, iba senden nungsa NHIDCL nungi teshimtet nübutem jaok.
NHIDCL nungi teshimtet nübutemi maparen dak sendakbatem tejangja metetdaktsü aser iba mapa tajungtiba nung inyaka aotsü asoshi board aser parnok tsüngda olemtepogo.
Latettsüba mapang tsüngda maparen renemtsü aser tajungtiba nung inyaktsü asoshi NHIDCL dang board-i tetuyuba agütsü.
Maneni, kasa senden nung District Welfare Officer-i PowerPoint ajanga Departmental inyakyimtem metetpeladaktsü, ta sangdong nung shia lir.

Kiphire : Brehostibarnü (08.04.2021) DC Conference Hall nung Kiphire District Planning & Development Board senden agiogo. Iba senden nung Deputy Commissioner & Vice-chairman DPDB, T. Wati Aier menden liasü, ta sangdong ka ajanga metetdaktsü.
Iba senden agiba mapang, Sangphure tesem nung Carpentry Training Institute amenoktsü asoshi teloki asadangshia jembi aser iba reju dak sendakba maparen inyaktsü asoshi tekolakpur dangi abentsü telok bangjemtep.
Taruba DPDB senden nung Power Department dang PowerPoint presentation agütsütsü asoshi metetdaktsüogo.
Maneni, iba senden nung ketdangsürtem, PD, DRDA Kiphire, Taliyanger aser RCS (ARCS), K. Liricham Anar nunger board nung züngokogo, ta kasa sangdong nung shia lir.