WSYF-i taoba mapang tatalokbatem asadangshitsü akhang

Dimapur, Rongchii/April 9 (TYO): Media osang balala nung Lamhainamdi yimtsüng ya Peren district nung lir ta sangdongba osang angazüka Western Sumi Youth Front bangkar. Iba tesem ya mangatettep adoker aliba tesem ka, aser Peren mesera Dimapur district nung züngoksema mali. Kasa mapang nung Opposition, lenir T.R. Zeliang-i April 5 nü iba tesem semdangba mapang state sorkar kübok Department Information & Public Relations-i ‘Lamhainamdi’ tesem ya Peren district kübok ali ama osang sangdongba ngua kanga bangkar, ta WSYF-i ashi.
Kiyevi yimtsüng ya Nagaland state mekümtet tsüngda 1939 küm amenok aser kuli kakettem balala ajanga mangatettep adoker aliba tesem ya Dimapur district, Dhansiripar sub division kübok Kiyevi yimtsü litsü nung aliba jangja jangja sayua lir.
Ajisüaka district ana tsüngda arrtsü ano mebentet ta angatetba den state sorkari kuli tejangja aliba dak ajemdaker ochi obendang agütsütsü ta amanga WSYF-i, mangatettep adoker aliba tesem ya Dimapur district kübok lir ta sashi sashia mejembir, saka ken o jangjatsütsü atema mapangshia ola adoka arudar. Onok ola madokba ajanga mangatetep adoker aliba tesem ya Kiyevi yimtsüng litsü nung mali ta bendanga agütsüba ama mangatettsüla. WSYF-i, taoba mapang koma liasü yamaji iba tesem ya Dimapur district küboki aitdaktsütsü atema tatem tashi nokdangtsü, ta ashi.
Lamhainamdi yimtsü ya mali aser Manipur nungi ali atsüngertemi Kiyevi yimtsüng litsü nung ozüng alema iba yimtsüng amenoktsü meranger. Anungji “Lamhainamdi” ya yimdangjem ka dang aser tang jembishinüba ken o nung shisemtsü malang.
Sorkari iba arrtsü ken o bentettsü süoki ia agir asünungbo, March 22 nü tatalokba dak dang merangloki taoba mapang tatalokbatema temulung agüja asadangtsüla.
State sorkari 2021 küm February ita Khehoi yimtsüng nung süngtonglitong raksatsüba aser ki rongtsüba asadangtsü atema tangsa tang asadangtsüla. 2011 küm Inavi yimtsüng village headman aser chairman tepsetba dena March 22 nü tatalokba temulung agüja bushitsüngdangba ama tanaben asadangshitsüla, ajita asünung dang telok anaprongla nem ochi obendang agütsütettsü. 2011 küm tatalokba ya tang CM-i Chief Minister mapa bener aliba mapang atalok aser tang tashi obendang magütsüi lir. CM atema taoba mapang tatalokbatem nung aibelena alirtem aputsü atema maongka tajung lir, koba ajanga tia maka March 22 nü lendong atalokogo. Iba ajanga telok anaprongla nem ochi obendang agütsütsü. Ken o ajunga bentettsü atema tatalokba ka dang shimba ajanga telok ka pusemba sayur aser taoba mapang takoksa ajururtem nem ochi obendang magütsür, ta kasa sangdong ajanga ashi.
April 8 nü Deputy Chief Minister-i, mangatettep adoker aliba tesem semdangba mapang sorkari iba ken o süoki ia agiba metetdaktsüogo aser SIT tentettsü indang jembiogo. Sorkari kasaji taoba mapang tatalokbatema süoki ia agitsüla aser SIT atsülangshia tatalokbatem ajak bushitsüngdangtsüla.
WSYF-i onok meyong litsü kümzüka ayutsü bendanga agütsür lir aser kasa mapang nung tebendang makai ochi obendang agütsüti süra takok tashi teka amteper inyaktsü mulunga lir, ta Western Sumi Youth Front Media Cell sangdong ka ajanga metetdaktsü.