Tsüngremer taochi amshiba

Nisung shiai sempet agizükba ama, aji agi Tsüngrem taochi jenti meyong ketdangpurtem tajung ama, nenok medemer o medemer na yaritepang. 1 Peter 4:10

Tatembangji koda arutsü Peteri lemsatepba liasü. Khrista tabensa taküm ali, aser ajak asoshi asü. Shirnoki osangtajungji angashia lir parnok taküm junga aser temenen memenai alitsüba dang masü saka Khrista tanaben arudang tatem bendangba nungi kümzüktsü. Tang pai tamanger taküm koda junga alitsü iba indang ashir. Mapa ajak Khrista ajanga Tsüngrem sentsüwangshidaktsütsü asoshi kari o jembira, pai Tsüngrem otem ama jembiang, kari tenzükra Tsüngremi agütsüba tashi ama inyakang. Idangji pai sempettem agizükba indang jembi. Pauli aiben tanela sempettem indang jembi (Rom 12, 1 Kor. 12), aser shibai Khrista agizüka lir pai pei agizükba sempetji jangjaa amshitsü ashi.
Tanü asenoka Khristan ka ama, Tsüngrem sempet balaka agizüka lir. Kodang asenoki temenen nangzüka amangdir idangjisa Tanela Temeshi dang agizüker masü, saka Tsüngrem sempet temeja agizüker. Asenok nisung shia balala ama Tsüngremi nisung shia nem sempet balala temeja yangluja kar. Asenoki kati ka tenzüktsüla. Khristan taküm nung ibaji taküm lidaktsüba teraji lir. Tangar nüngdak nung yaritsüba, tamanger aser mamanger ajak. Kodang asenoki iba sempet Tsüngremi bilemba ama amshidir, asenok ketdangsür tajung ka ama kuli sayur, Tsüngrem taochi tangar dang sayuba jagi Pa taochi amshir tajung ka ta sayur. Asenoki tangar tenzükba nung iba taochi anogo shia amshitsüla.
Tsüngrem, kü nem sempet agütsüba asoshi Ne tenüng asanger. Ni iba sempet shisa kaa amshitsü yariang. Amen.