Alangzükba züh

“Saka tarak aser pungmen maket san chanu senti züh, oda Khrista züh agi nenok alangzük, aji meteta nenoki tetsübu nung nenok aenersa amungba mapang süidakjang.” 1 Peter 1:19

Tejen ozüng putu nung nisung taküm ka ozüng ajanga taitsüba ngur lia iba nung jagi alangzüka akhi jenjang dangi bener arutsü asoshi san tebong rongnung pungmen mesüra tarak maketba shimteta, iba sanji tepseta azüh tenlaba agi, takümji tanaben meyipa alangzükasa aru. Item putu nung sen zühji taküm ka alangzüker asünung kanga dang tematiba jenjang nung senti süa amlepa aruba angur. (Levi 22:19-20). Kodangsa pungmen aketba shiruru tenla, idangji Kibubai magizük aser shiba asoshi tenla, idangji Kibubai magizük aser shiba asoshi tenla pa taküm nunga temelenshibaji marur; saka kodang ozüngi aginüba ama san pungmen makaba zühji tenladir ibaji Kibubai agizüker ta parnoki amanga benlepa arua liasü.
Iba ama tangatetba nung amanga aser benlepa aruya aliba mapang ka nung Tsüngremi Pa ajaso chir Yisu Khrista alimai yoka, oda kangkidong nung pa senti züh toklepa tematiba tenla tenlaba agi Pai meimchirtem khenyongi, teti atema takümji alangzük. (Ibri 10:10).

Sarasadem
Kibuba Yisu, Ne senti züh ajanga kü taküm teti asoshi alangzük nung Ne tenüng asanger. Amen