Tongpang rara mesüra tazüokba ?

Kechiaser Kibubai shiba dang meimer pa merenshir aser Pai agizükba techir ajak dak azüker. Ibri 12:6.

Khristan shia jangratemtsü masüba mapatem atalokba ajaki tanelaren tongpang rara ama bilemer. Kodang timtem ka atalokdir, idangjisa iba timtem agientsü aikati Tsüngrem dang asüngdanger. Parnok timtem tebilemtsüji Satan mesüra tanelaren kechi prok aji arur ( Gal. 6:7) ta agizükdang nungibo Satani asenok amaker ta agizübaji tali tamarenba lir.

Temeim Tebui arütsübaji Satani merenshir ta aibilena angatettsü akok. Nai tanelaren tesayur ka ama tanur dang mesayura, Tsüngremi parnok temenen nung tsükdaktsütsü akok. Na tenzük nung ochi meshira na melenshitsü asoshi iba nungi adokbaji nai agidaktsütsü akok. Ne mulung masüba temulung süa kümdakjang ta sarasademtsübaji tamashi asütsü. Nai temulung agütsütsü aser ne taküm nung nüngdak temelenshi adokdaktsütsü asoshi Tsüngremi na azüoker. Ne tebilemtsütem Tsüngremi azüokba den sendaktepa melira koda lendong. Tsüngrem azüokba Satan mapa aser tanelaren tongpang rara ka ama agizükra Tsüngremer tazüokbai kodanga meyaritettsü. Nai ajuruba timtem ajakji Tsüngremer tazüokba masü, saka  Tsüngremi na azüoker ta Laishibai sayur.

Tsüngremi arütsüba nai mangatetra Tsüngremi ne sarasadem melangzür aser Satan nungi kümzüktsü makoker ta nai tenüng asentsü akok. Saka nai temenen menabayong timtem ajurur ta Tsüngremi ne nem tekümdangtsü agütsür. Ne taküm nung timtem mapang ajurur asü? Ibaji Tsüngrem tazüokba asü? Tsüngrem, shiba temeim nung tabensa lir, Pai tatem nung tajung agütsütsü Pa mulung nung alinung Pai na metongshitsür.