Ochi agi kin ka kümzüker

Mapabo tilaka amai aser teinyaksangjia tereprangtsü nunga tilar ka dang saka pai inyakba mapaji ochi, teindang aser mapa shitak inyakba agi pei kin aser pei nübortem meteta aser memeteti tesama lendong tuluka nungi kümzükogo. Paji Karbi Anglong, Assam nung Home guard, Borsing Bay lir. Pa ya asenok ama manger sangwa nung takar kümnüba meindang aser ochimashi nisung ka asübo, tan Hombar aonung to parnok mita anükdak, Dillai check gate nung takar kümer lila. Iba aonung ya 9:30 ako shi nung Imphal nungi Guwahati leni aoba bus ka nung ozüng agi memelaba mozü sen crore 12 jenjang gari anishisang jagi gari engine anasa jungjunga aleper miima bener ooya lia, Borsing Bay-i putet. Joko, koda mesüi oset sen paika jenjangji mepudaktsütsü mechi gari anishisang jagi Borsing-ji sen aika agi mesüzüktsü merang saka pai manga aser ozüngi memelaba mozü den mozü shibelenertemji apu. Ano, tajung kaji iba ochi mapa inyakba osangji angashia, Assam police nung tulutiba , Director General of Police, Bhasjyoti Mahantai Borsing nemji tepela aser tenüngsang sempet sen lakh ka agütsüogo. Atangji, sen tsütsüji bilemdangra, Borsingji kanga akoksar amato asenokibo bilemtsü, kechiyong mozü shibelenertem jagibo pa nem, ashiko, sen crore junga agütsüdi tepu ta shia alitsü. Ajisüaka, Borsing asoshi senji masü saka kechi mapa inyakdir inyakaka ochishia indangindanga inyaktsüla aser pa yangku nung semer par kidangi aoba senji ochishia aaba sen asütsüla. Iba mulungsentsüji koda temerük aser iba nisungji koda akhüm taket, shitakba pei lima tsükchir nungi kümzüktsü asoshi taküm bendanga agüja inyaksangji pa lir. Pa amaji,  Assam nung Home guard aser police ajaki inyak nungbo Assam dang masü saka India nung nisung taküm aika machimajemtsü chia ajemba timtem takoksa nungi kümzükla.Borsing Bay temulungsentsü aser pai inyakba mapaji kodang asenok Nagaland nung alirtem den medemdangdir, asenokbo pa denjibo atishiteptsüla masü. Ashiko, asenokibo paji tekolok mait, shisa maka, matumalem, sen crore ta masüyonga lakh ter metsüka danga meshir odaktsüdi to, kechi balaka ta pajiang menüja bilema alitsüa akok, kechiyong asenok asoshibo ochimashi agi aser sübokrem agiba agi bendenba rongsenjiang shitakba amato jangratema bilemer. Aji oda, asenok aliba ki aser anogo shia asen mener jajaba gari aser asen chiyongba chiyongtsü teimbaka ochimashi mesüra sübokrem ajanga aruba rongsen aser chiyongtsütem lir. Tanga mapang nung atalokbatembo yutsür, tang ama tim mapatema sadema meinyaktetba mapang nung asen lima nungbo yi ajemertema shitak talubo ngua ajemer aser mozü achirtema  shitak ngua achir. Ibaji tesüngmangtsüka lir. Kodang asen lima nung ozüngi memelaba mapatem sademsadema inyaktetba mapatem ya bilemdangdir, Assam nung ozüng raksaba mapa anema ochishia inyaker Borsing nem DGP-bai pa mapa tajung reprangteta senpet sen lakh ka agütsü süra asen lima nungbo jet ta meyiper, tang ama mokdangba mapang nunga dena Nagaland-i yi aser ozüngi memelaba mozü bener arutetba nisungtemji bushia senpet agütsüang asenok asoshibo tapetba asütsü südi ta bilemer. Asenok Nagaland yabo ozüng raksaba mapa anema inyakba nung masü saka ozüng raksaba mapatem nung toktepba lima ka amato kümdagi. Shibai mapa meranga inyaker ta masü mesüra shibaibo  ochishia aser indangdanga pei lima aser nübortem tenzüker ta masü saka shibaibo mapang tatsütiba nung mapa meinyaki kanga takar kümtetter ta asüba sentong nung tokteper amato asenok ajak toktepdagi aser shitakba itemji dang konang nüngsanga angur aser parnokji asenoki lokti senden nung tatishitsü tajung agitsü atema tongti tesemdanger südaktsür. Aji oda, shibai Nagaland asoshi inyaker ta masü saka shibai Nagaland tenüng nung aruba sen teimba chitetter aser shibai teimba sarutetter ta asüba nung asenok ajak tetokteper kaka lir. Iba jagi Nagaland shiranger. Asenoki ochimashiba rongsen agi asen atema kiojen tajung yangluba agi Nagaland topur ajungtsü amai bilemer saka alima yabo ochi aser teindang mapa agidang topur ajunger. Atangji, kijibo tajung saka yimti yimdongbo majung, kimalen ozüng raksar onsara, nübortem rongnung tesünep mali, light junga marur, mozü kidang taneptsü mangur, tetsürtem pei temang yoka alir aser teburtem rakzükratemba agi chiyonger, tetsübu agi yimti nung kecha mienyaktetter ta aliba lima aser yimtiji kechi sütsü ?  Tanü asen lima iba tia nungji lir. Asenoki asen kin ajungkettsü indangbo kanga jembir saka asen kin masü saka asen ajungkettsüang bilema ochimashi mapa ser nung ochishia inyaker ama inyakba ya  asenoki inyaktetba tesüngmangtsü mapatem rongnung ka asütsü. Apijemtsü Shin 14:34 nungbo ashir, teindanger aser ochishirtemiang kin ka ajungkettsü. Pei lima ajungkettsü aser kümzüktsü asoshi ochishia inyakba mapa ya tulur aser takari dang ta masü saka Borsing ama tilariang tuluba inyaktettsü. Ochi agi alima ajungkettsü tenzükbaji yamaji tilaka nungi tenzüker.