IPFT lenirtemi BJP national tir JP Nadda den ajurutep

Agartala, Aami/June 24 (Agencies): Tripura nung BJP den longjemer aliba Indigenous People Front of Tripura (IPFT) party lenirtemi BJP national tir JP Nadda den Bodhbarnü nikongtsütsü New Delhi nung ajurutepogo.

Tripura nung talisa tribal tem aliba tesemtem nung BJP aser IPFT pusemertem tajemba küma aoba mapang ka nung BJP national tir JP Nadda-i IPFT lenirtem jaoka liasü.

Tripura tribal welfare minister Mevar Kumar Jamatia densema IPFT lenir pezüi BJP national tir JP Nadda den New Delhi nung par kidang ajurutepa liasü.

IPFT lenirtemi JP Nadda nem tezüluba nung takhangba ka agüja liasü. IPFT lenirtem aser JP Nadda na tsüngda minute 45 sensak sema liasü. Parnoki 2018 küm Ministry of Home Affairs (MHA)-i tentettsüba High-Power Modality Committee dak sendakba nung sensaksemogo.

Parnokisa, 125^th Constitutional Amendment Bill agizüka TTAADC nem tashi agütsütsü, Tripura Territorial Council tentettsüba, Kokborok oshi atema roman script amshitsü melatsü aser department balala nung ST aser SC atema mekazüka yuja aliba mapa tazüngtem süngdaktsütsü asoshi Special Recruitment Drive ka agitsü asoshi benoka sensak asem.

BJP lenirtem aika Trinamool Congress (TMC) nung adentsü asatepdar ta osang adoker aliba mapang iba senden menogo.

West Bengal Assembly elections nung takok tajung anguba sülen Trinamool Congress-i Tripura nung party asüngsashitsü atema merangdangar.