Yimdaki Aor

– P. Alem Jamir.

Khen mapang kecha meyimlai lia ajungbena nüburtem ajak pei yimdaki meyipa oa alitsüsa aküm. Pei  taküm kümzüktsü asoshi tia tamajung nungi ajener nüburtem shirnok pei limai meyipa aru parnok rongnungji wabong Bendangliba aser par kibong densema liasü. Bendangbai yim toktsür joko putu ana shi süir. Pa tanur asüdang yim toktsür ao saka tangbo par kibong nübener kümogo. Pai tangar kintsür agi, aji saka Aor sobaliba nung aketba ama laji bendangtsür masü saka yimtsür tajung rongnung ka ta yimertemi züngshir. Tang ajungbena par kibong sentong melenshi aser temenungratsüka tanaben yimdak alir.

Wabong Bendanglibar kibong town nung oa ali alia ki tajung sür mapang talangka yangji jangratema lia aru. Saka tang koda masüba mapang ka ajurua inyakyim ajak mebilemba lenmangi melenshi. Joko koda masü nungji par ki aser kima gate nungji dala tulutiba yok aser pei yimdaki apusoa ao. Aji oda süaka, alima mesamara yimdak nungi ano tanaben meyipa arua kiji mesemtettsü ta bilema kidang akaba oset ajakbo maben.

Oda ashitsü agi Canaan lima ayawara kanga sashiba ajanga Yakober kibong khen atema Egypt-i aluba to mesüka iba ya liasü. Ashiko parnok apusoba anepdang to, asenok kopi melii tanaben Canaan lima yagi meyipa atutsü ta jembia apusor südi. Ibaji bilemteta mapangi bener arutsü nungji kenüp Bendanglibar kibong yimdaki küpzüka ao. Parnok apusodang tongtibangsa par tanurtemi parnok aliba town-ji kanga menungraa liasü. Kechiaser parnok asoshibo bendang limajiang par lima aser pei senso limajiang bendang lima ama kümatoker liasü.

Anogo ana tejaklen Bendangbar kibong yimdaki shilangba sülen yimdong nung yimer kar ajurua Bendangliba den jembir:

“Hai, kua kodang aru ya?”

“Yakanü aruba ako ya”.

“Kinungertema kodasa lir?”

“Tsüngremer taochi nung ajak junga lir.”

“Nenok shibasa aru?”

“Ozü kibong ajak arua lirko.”

“Oh ajita na? kanga junger to.”

“Aser kodang meyipa aotsü bilemdar?”

“Odang mapang nem shidaktsüdi.”

“Yasüng ni ner yokyasonü to ajanga süidang yangto kimung tasen ka atur ama angua to?”

“Nai angubaji shitak. Yangto ozü atema tanü nungi ki ka tenzüktsü.”

Aya aji kanga junger to. Yimdak ki tasen yanglur ajema kümogo. Saka taküm balaka ki tasen aika yangluba ngua kanga pelar. Taküm ya balaka bendanglen alir yimer aika arua yimdak kisen yangluba ya kechi tetezüar na? tasa bilema alir ako.”

“Hau aji nai shitak ajitetogo aser tebilemla bilemer. Na meratatsü atema ni otsüji shidi. Onok alidak bendang lima nungji taküm agi küm ishika tzünglu khenyongi marur. Onok alidakji atsüki nung aonsotsü, tsünüsempongtsü aser süngdonglidong ajak anü tatsük agi asüba dang masü tzübu ajak rosepogo. Sen liaka joko tzü alia ajemtsüa mangur. Meimchirtem tzü makai koda taküm alitsü? Iba jagi taküm kümzüka alitsü asoshi yimertem tzü akadak alitsü pei yimdaki meyipa aruba lir! Ashiko alima ya yamai dang ora ano kopi melii bendang ter nung perokshia alir yimertem ajak pei limaisa adenshitsü, kechiyong yimdakbo tajemtsü tzü temerük peria dang lir.”