Representation agütsüba atema DoSE ajanga metetdaktsür

Dimapur, Chiteni/July 02 (TYO): Department of School Education kübok mapa inyaker ajak dangi Directorate School Education ajanga sangdong ka nung, mapa inyaker (employee) temi tim lenmang paidoka temaba ketdangsür nem petitions/representations agütsüba ya department-i süoki ia agitsü aser iba totuyuba nung aibelener anema tapet temerenshi agütsütsü aser Nagaland Government Servants Conduct Rules, 1968 indang Rule 4(1)(iii) aser Rule 19 nung melaba ama inyaktsü, ta metetdaktsü.

Nagaland Government Servants Conduct Rules, 1968 nung yamai shia lir:

“SUBMISSION OF PETITIONS: Department nung pei den atongba (immediate superior) ajanga dang ashi sorkar tenzüker shingaia sorkar mesüra temaba ketdangsür (higher authority) dangi indang indanga petition kecha magütsütsüla aser sorkar tenzüker shingaia iba amala petition indang copy ya danga authority dangi meyoktsüla, tatishitsü agi, shia aliba petition ya indang-indanga sendaktepa aliba authority alema danga department indang Minister mesüra Member of legislature tem nem magütsütsüla.

TEMETETTSÜ- Sorkar tenzüker kati service temeden mesüra ‘conditions’ dak sendakba nung timtem kar ajurua itemji bentetnüra mesüra teyari bushinüra, pa den atong temaba ketdangsür (immediate official superior) mesüra pa indang office nung tekolakba mesüra item maparen inyaktettsüsa aliba iba mesükba ketdangsür jenjang teküpokba nem agütsütsüla.

Tim lenmang nung ‘lower authority’ ajanga item ken o magizük mesüra agizüktsü memolung mesüra senzüka yutsü mesüra menua magiba sülen ang temaba ketdangsür dangi temepishiba mesüra representation ya agütsütsüla. Item amala temepishiba mesüra representation ya agütsüba mapang tim lenmang (proper channel) ajanga temepishiba mesüra representation indang advance copy indang indanga agütsütsü akok.

Sorkar tenzüker shiai representation ya pa/la tenüng temeja nung agütsütsüla, ta nenshia metetdaktsür. Arok tejangraba atema sorkar tenzükertem külemi (joint) representation agütsüba ya yimya meshidak amai züngshitsü aser magizüktsü, ta sangdong ajanga ashi.