MLA & Advisor Toshi Wungtung asükhu maneni lemsar

Dimapur, Chiteni/July 02 (TYO): Principal Secretary, Home ajanga sangdong ka nung, Asür Toshi Wungtung atema State Funeral ya Honibarnü (03/07/2021) Purana Bazar, Dimapur nung par kidang anepdang 8:00 ako nungi agitsü aser iba sentong ya MyGovNagaland Channel nung Live Stream asütsü, ta nenshia metetdaktsü.

Tejangrartemi iba sentong ya YouTube aser Facebook nung MyGovNagaland page mesüra https://youtube.com/channel/UCYpIWIAk_KPBdqvToVHmB6g/live nungi reprangtettsü, ta ashi.

Asür Toshi Wungtung Advisor, I&PR, SCERT and Village Guards temang anepalua New Delhi nung amungdang July 1, 2021 nü asüba asoshi aoksar aser jashir, ta Nagaland Chief Secretary, J. Alam IAS ajanga sangdong ka nung ashi.

Shamator jila nung K. Yamakam Yimchunger’er jabaso Toshi ya 20.08.1964 nung aso aser pa Shillong aser Delhi nung zünga liasü. Pa ya kaketshir tentet balala nung tenzüka aru aser item rongnung Naga Students’ Union Delhi nung tir inyak, Member Consultative/Advisory Committee Naga Students’ Federation, Spokesperson aser Advisor Yimchunger Tribal Council aser General Secretary Eastern Nagaland People’s Organisation inyak. Asür Toshi Wungtung ya pai nübur tenzüknüba ama 2018 küm 58 Shamator-Chessore AC nungi MLA ka ama shimteta liasü, ta ashi.

Toshi Wungtung ya kaketshir asüba mapang nungi tesüiba 30 shi kanga junga meteta liasü. Pai Eastern Nagaland loktiliba-rongsenketsüng aser shisaliok ajungkettsü aser state ajunga tekeraba nung renloktsü asoshi tejangraba liasü, ta Chief Secretary ajanga ashi.

Tia maka pa anojungi asenok yutsür ogo, aser pa asüba ya Nagaland asoshi tashi tait aser temeim agi sünga aliba nübu tajung ka samar. Ajidang masü, ni atema tembar tajung ka samaogo, ta Chief Secretary-i ashi.

Pai nüburtem asoshi tasü ita mapa tajung inyakba atema teti bilemtettsü. Pa anojungi asüba ajanga tawa adokdaktsüba asüngtsü kanga tasak asütsü, ta pai ashi.

Working Committee, Naga National Political Groups ajanga sangdong ka nung, adianu aser lenir Toshi Wungtung asüba osang angashia aoksar, ta metetdaktsü.

Pa ya Yimchunger mesüra ENPO atema kisüng lenir masü saka Nagaland atema tejangja jabaso ka lir.

Sentong aika nung WC lenirtemi pa den Naga nunger nükla lemsatsü maongka ajuruogo, ta ashi.

Pa ya nükla tajung aketba lenir ka liasü, shiba tantsü-tambu temi senmanger tajung ka ama züngshia liasü. Lanurtemi pa dak ranglok aser sakloka liasü. Pa ya tasü tait civil society lenirtem asoshi milen abener ka liasü, ta WC, NNPGs ajanga ashi.

Ajungbena Toshi Wungtung, MLA & Advisor IPR, SCERT &Village Guards, Nagaland asüba osang angashia Naga Hoho aoksar aser jashir, ta Naga Hoho tir, H.K. Zhimomi-i sangdong ka nung ashi.

Asür Toshi Wungtung ya ajemaliba aser bendanga agütsüba lenir ka liasü, shibai Naga nunger atem shilem tulu agiogo. Pai jenjang balala nung Naga nüburtem tenzükogo. Pa ya Naga Students’ Federation (MSF) nunga Advisory Committee züngsem ka ama inyak aser Forum for Naga Reconciliation (FNR) nunga züngsem ka ama inyaka liasü. Pai Naga nunger lungjemtsü asoshi bendanga agütsür inyakba aser shilem agiba atema teti bilemtettsü, ta Naga Hoho sangdong ajanga ashi.

Asür Toshi Wungtung kinunger aser tembartem den asükhu lemsateper, shiba New Delhi nung July 1 nü asü, ta Medo Yhokha, Advisor, Technical Education and Elections, Governement of Nagaland ajanga sangdong ka nung ashi.

Pa ya takotet lenir ka liasü, shibai tatishitsü tajung agi nübur ani, teshisadanger tajung aser tzü-mopung wazüka ayur tejangja nübu ka liasü. Pai teti lokti ajungtsü atema bilema liasü, ta Advisor Medo Yhokha-isa ashi.