Peren DTF senden menogo

Peren, Chiteni/July 19, 2021 (TYO): Hombarnü, DC Conference Hall, Peren nung DTF Chairman aser DC Peren, Sentiwapang Aier-i anir, Peren District Task Force on COVID-19 aser vaccination committee den senden ayonga agiogo, ta sangdong ka ajanga metetdaktsü.

Iba senden nung, Dy. CMO Peren, Dr. Lanuakum-i, district nung Covid puteta alirtem/shirangertem aser Covid-19 tendangba indang osang metetdaktsü, kong tanü tashi district nung Covid-19 tashidak puteter nisung 741 shi kümogo, iba wara agi shiranger nisung 18 lir aser  ‘positivity rate’ shilem 8.1% asütsü, ta pai ashi.

Dr. Kiholi-i district nung vaccine agütsüba osang agütsüba mapang, July 18, 2021 tashi dose 19,843 (dose anaprongla densema) shi agütsüogo aser district nung temsüa alir nisung shilem 26% tashi nem vaccine agütsüogo, ta lai metetdaktsü.

DTF & Vaccination Committee züngsemtemi,  State Sorkar ajanga agütsüba Unlock-III tetuyubatem nung tatsü-talang ajak asadangshia jembi. Iba  den külemi, district nung Covid-19 tendangba maparen mesüra Vaccination campaign tem kara achaayanga inyaktsü aser district nung ambulance service junga achaayang masüba indang onüktem nung züngsemtem olemtepa liasü.

Kasa senden nung, Kuki Inpi Nagaland nungi teshimtet nübutem aruagi aden aser Primary Health Centre Ahthibung nung doctor tem maliba indang tebilemtsü tem lemsatep. Iba dak sendakba nung DTF Chairman-i  achaayangtsütsü asoshi nangzükogo.

Maneni, iba senden nung Medical Department-i, Covid tendangba, tashidak tsüngsü bushiba aser Vaccination drive mapang, sentong tem takok angutsüsa, Medical Department den amalitepa inyaktsü asoshi SDTF aser Village Council tem dang metetdaktsütsü atema  DTF dang mepishiogo, ta kasa sangdong nung shia lir.