Wokha nung RAT tendanga senzü

Wokha, Chiteni/July 19, 2021 (TYO): District Task Force senden nung bangjemtepba ama, nübur tsüngda Covid-19 tashidak prokba nokdangtsü asoshi, Hombarnü (19.07.2021) DTF den Medical Department longjemer Wokha town kübok tesem trok nung Random Antigen Test (RAT) agiogo, ta sangdong ajanga metetdaktsü.

Shishilembar, süngolemba ayokertem aser dokan kiburtem Covid-19 atema tendangtsü nükjidong nung Random Antigen Test (RAT) agia liasü.

DTF aser Medical Department longjemer ayongba Random Antigen Test (RAT) mapang, sample 450 shi bendenogo aser item sample rongnung sample ka dak Covid tashidak aliba tendangtet.

Wokha town kübok NST colony, Chukitong Taxi stand, Co-operative Bank, PWD junction, daily bazaar aser police point area tem ayimjema Random Antigen Test (RAT) agiogo.

Covid-19 ali mali tendangtsü ajungmesotsü atema, Wokha District Chambers of Commerce & Industries (WDCCI) president, Renpithung Kikon-i anir RAT team nem teyari agüja liasü aser züngsem aikati atsüayong melii tendangogo.

Tang ama tensa den apet maparen ajiteta inyakba atema Kikon-i DTF dang pelaba metetdaktsü aser tarutsü nunga maneni amalitepa inyaktsü asoshi pai nangzük.

Hombarnü tenzükba Random Antigen Test ya July 23, 2021 tashi jila tesemtem nung agitsü aser iba sülen district tesem ajungalen tarensen nung agiyonga aotsü sentong lir. Mongolbarnü (20.07.2021) Vankhosung Mission Centre nung Rapid Antigen Test (RAT) agitsü. Iba sülen, July 22 aser 23, 2021 anogo APMC, Wokha Village aser Longsa village nung ayonga agitsü terenemba lir.

Maneni, iba Rapid Antigen Test agiba mapang, Wokha District kübok colony Council Chairman aser Village Council tem dang Medical Department/ Testing team den yaritepa inyaktsü asoshi District Task Force-i mepishiogo. Iba den bendenloksema, Rapid Antigen Test agidang, nübur ajaki Covid-19 dak sendakba SOPs nung anidaktsü mepishir. Rapid Antigen Test maparen anepdang 8:00 ako nungi tenzüktsü, ta kasa sangdong nung shia lir.