Noklak district kübok yimtsüng 11 nung Poultry Farms amenok

Kohima, Chiteni/July 19 (TYO): Noklak Police aser ICAR na senteper Noklak district kübok yimtsüng 11 nung poultry farms amenokogo. District nung aliba lanurtem tashi lenmang shidak nung amshitsü nükjidong nung “for self reliant Noklak” omen nung ajemdaker iba mapa tenzükogo.

Noklak Police sangdong ka ajanga, ICAR-i anchanu 2000 agütsü aser anchanutem ya Self help groups (SHG) 12 nem lemtsüogo, ta ashi. Noklak police aser Noklak nung amenoka aliba NGO temi iba sentong takok asoshi ICAR den angatettepa inyaka aruogo, aser kasa mapang nung TRPO tir Hangthing aser KMH tir Newkai nati anchanu lemshiba aser belenshiperaba nung teyari agüja liasü, ta kasa sangdong ajanga metetdaktsü.

SP Noklak, Dr. Pritpal kaur IPS-i, lanurtem ya linük asoshi tarutsü nükla lir aser mapa balala inyaktsü asoshi maongka aika meliaka, taküm libaliro jenjang tajungba küm yanglutsü atema peisasa inyakteta liyonga aotsüji lenmang tajung ka lir ta ashi.

Dr Kaur-isa, entrepreneurship atema SHGs tenzükba lanurtem aika nem poultry farm lapoktsü asoshi anchanu agütsüogo ta ashiba den, lanurtemi iba mapa inyaktsü asoshi tejangraba aliba reprangtetogo, ta ashi.

Laisa, lanurtem tashi ya lenmang sayua mapang shidak nung mamshira, district nung temesepba mozü achiba aser tanga yimyayimpong tamajungtem benshiba tebilemtsü aliba ajanga lanurtem aser lokti dak kanga kara kongshitsü. Anungji tetenzük nung lenmang shidak sayuba ajanga nisung ka pei mapa nung tetangshi kümdaktsütsü aser iba ajanga lokti renloktsü. Maneni iba ajanga Noklak ya tangar dak memetaloki aliba district ka kümdaktsütsü, ta ashi.

Kasa mapang nung Noklak Police aser KVK Tuensang na senteper Noklak nung aluyimertem nem basmati jang metsü agütsüogo.

SP-isa, Nagaland nung taküm tesem aika nung tsüngsarosa ulura lir, ta shi aluyimertem dang tzü bendena ayutsü aser tzü kanga kümdanga amshitsü ajungshi. Maneni lai, COVID-19 wara ajanga state mokdang ayuba agi metsüjangnatsü lemtsütsü asoshi menoadok, anungji aluyimertem dang metsü tekaratiba nung mekoa atemtsü asoshi sayuogo, koba hopta ana shi dang agitsü, ta ashi.