NPF telok PDA government nung adentsü, Nagaland Assembly nung opposition malitsü

Kohima, Jul 19 (TYO) : Nagaland yimten nung meimlaika, tanü opposition telok Naga People’s Front (NPF), tang yimsü tesüdak NDPP teloki aniba People’s Democratic Alliance (PDA) government nung adentsü telemtetba agiogo. Iba tatalokba yagi, joko, tang nungibo Nagaland Legislative Assembly nung opposition telok mali kümogo.

NPF lenir aser taoba Chief minister Wb. T R Zeliang-i anir mulungsua dang PDA government nung adentsü renemogo aser Mongolbar nü Chief Minister Neiphiu Rio ajurua tezüluba nung agütsütsü ta NPF Legislature Party tenüng nung o jembir Wb.Imkong L. Imcheni iba osang bener den jembidang metetdaktsü NPF telok PDA government nung adentsü telemtetba ya Hombar nü Dimapur nung Wb.T.R.Zeliang’er kidang senden ka mena lemtet ta paisa ashi.

Ajisüaka, NPF tatartem ya NPF telok nungsa alitsü asü mesüra PDA nung aliba yimten telok ana – NDPP nung adentsü asü mesüra BJP akümtsüar, ajibo mejangjateter. Item ajakji Mongolbar nü NPF tatartemi tezüluba nung Chief minister nem agütsü dang metettsü.

NPF tatartem Nagaland PDA government nung adentsü telemtetba agiba ya, tanga masü, saka kenbang obang ka ser Naga yimten tebilemtsü ya tekaratiba nung latettsü teimla aser tangatetba nung agiogo ta Wb.Imkong L Imchenisa ashi.

Kasa ya 2015 küm-a Congress MLA 8 NPF telok nung adenba agi tatar senden nung opposition mali aküm. Iba jakdanga Congress teloki yimsü asüdanga Nagaland assembly nung opposition mali asü.

Naga yimten tebilemtsü ken o tatembang küma latettsü asoshi India government-i NSCN(IM) aser tanga tanüngba Naga yimten telok NNPGs den jembia arudagi. Parnok ajak den yimten ken o tejembitsü tashibo 2019 küm October ita nung jembiogo ta metetdakja lir saka tang tashi telemtetba magiteti lir.

Tang tashi nung NNPGs telok denbo ken o tembanga jembiba angazüker saka NSCN-IM den Naga nunger temzüng aser wako dak sendakba onük nung ken o kar metembangteti lir. Ano talisa, Covid-19 wara aliba yagi ken o tembanga jembitsü mekoki kümadoker anena lir.