Malaysian opposition MP temi PM mapa nungi anentsü akhang

Kuala Lumpur, Malaysia nung longkak aitba sentong ka agidang Malaysian opposition züngsem Anwar Ibrahim, abelen nungi pezübuba, aser Mahathir Mohamad, abelen nungi tanabuba, nungeri “Muhyiddin aser Cabinet anenang” ta zülua bener jajaba noksa nung angur. Ato Kilonser Muhyiddin Yassin menden nungi alung ta takhangba agüja Malaysian opposition lenirtemi Kuala Lumpur nung parliament tsütsüi jaja ao.

Kuala Lumpur, Luroi/August 02 (Agencies): Malaysia nung opposition MP temi Hombarnü Ato Kilonser Muhyiddin Yassin mapa nungi anentsü khanga parliament leni tetsüng agi jaja longkak aita ao. Parliament nung Covid-19 tashidak menatepa aoba nokdangtsü atema Hombarnü senden thinentsüba sülen parnoki iba jenjang agi.

Yimti nung lenmang tongtiba nokdang yuadoker asünung MP tem Parliament nungi mile ka shi pilar moapu ka nung ajurutep aser “Muhyiddin mapa nungi atsünginang,” aser “Muhyiddin tasümait,” ta yimyim ayima Parliament leni ao. Parnok madenshi tsüngda Security akangshiadoker liasü aser police temi Parliament-i aiba lenmang tongtiba mokdanger liasü.

“MP timba onok tsütsü lir ta sayutsü onok adenshi; Muhyiddin’er sorkar tanü chirepogo,” ta opposition lenir Anwar Ibrahim-i ashi. Paisa, sorkar toktsütsü atema party kari mepeshiogo. “Anungji tanü onok 107 den parnok bendenloksemera, sorkar chirepogo,” ta pai ashi. Police temi parnok ki telungi aitsü temelaba magütsüba sülen Anwar-i sentepa alirtem senshidaktsü.

Malaysia nung taküm küm atema mezüngbuba taoba hopta parliament mena liasü, saka emergency benoker aliba dak sendakba nung house mashiyimi aniba atema sorkar minister ka chubai Brehostibarnü aitsüba sülen thinen. Health-Director General-i Deobarnü, taoba hopta tashidak keta alir kar potetba sülen iba ki nung tashidak menatepa aotsü ana nung lir, ta ashi.

Opposition-i Muhyiddin anema motion of no-confidence ka benokogo aser ashiba agi, Covid menatepa aotsü ana nung lir ta ashiba ya Hombarnü senden thinentsütsü atema tatemtsüka. Health dak sendakba telok balalai inyakyim shidak benoka anidakra parliament inyaksangshitettsü ta shiogo.

Anogo pongu amentsü atema latetba session ya Hombarnü tembangtsü liasü aser iba ajanga sorkari wara achaayangba dak sendakba nung Muhyiddin aitsütsü asoshi MP tem atema maongka tajung ka liasü. January ita emergency benokba sülen covid agi shiranger asemsü agi timba kümogo aser iba ajanga nüburtem pa dang kanga mepelar.