Power department ya welfare department ka masü: Advisor Tovihito

Dimapur, August 27, 2021 (TYO): Power department ya welfare department ka masü aser nübortemi electricity atsükba atema bill agütsütsüla kechiyong iba ya tax masü ta Power department Advisor, Tovihito-i ashi.
“Asenoki atsükba atema sen agütsütsüla” ta paisa metetdaktsü.
August 27, 2021 nü Additional Secretary Power, Mohammed Ali Shihab-i SLDC complex , Nagarjan Dimapur nung senden ka ayonga amendang Advisor, Tovihito-i iba olen jembi.
Dimapur district nung power auyaa atsükba noktangtsü, bill saruba inyakyim tajungba akümtsü aser power system tiptema ayutsü atema iba senden ayonga amen.
“Nagaland nung aser talisa Dimapur nung commercial maparen kanga inyaker aser power melira, rongsenketzüng maparen ajak anentsüsa akümtsü” ta Tovihito-i ashi.
Power department-i revenue shitak angutsü atema civil society teloktemi yaridaktsünür. Department aser civil society teloktem yaritepa power atsükba indang sen agütsütsü tangatetba lidaktsütsü atema sentongtem ayonga agitsü, ta paisa metetdaktsü.
Advisor Tovihito-isa Department dang district administration aser police dena sendaktepa alirtem den amalitepa inyaka aotsü ashi.
“Dimapur district nung koda masüba mapang dak alaka power shut down malitsüla” ta Principal Secretary Power, K.D. Vizol-ia ashi.
Ajisüaka, Dimapur nung power shut down alir aser iba ya nisungtemi power auyaa atsükba ajanga lir. Nagaland kübok Dimapur district nung power 50% tema atsüker aser power auyaa atsükba anendaktsütsü atema special committee ka tentetogo, ta K.D. Vizol-i metetdaktsü.
“Power department staff aser talisa meter reader tem office-i shitak aotsüla aser mapai junga marurtem ozüng tapet agi merenshitsü. Electric bill shitak angutsü atema civil society temi yaritepdaktsünür” ta paisa ashi.
Sentong nung Dimapur Deputy Commissioner, Rajesh Soundararajan IAS-i o jembidang electric bill magütsüba inyakyim ya magienra tensa tamajung nungi tamajungtiba ajurutsü.
Dimapur nung commercial maparen teimba inyaker anungji power supply shitak melira takoksa angutsü, ta paisa ashi.
“Dimapur district administration-i akokba tashi power sector tashi itdaktsütsü atema team leader aser department den yariteptsü” ta Rajesh Soundararajan-isa metetdaktsü.
Iba senden nung DUCCF, DNSU, DMC, Naga Council Dimapur, Chumukedima town Council nungi teshimtet nübotem aden aser parnoki pre-paid metering system dena tanga tebilemtsütem lemsatepa liasü.
Senden nung mendenji CE, Distribution and Revenue, Engineer Moa Aier liasü aser power department, Chumukedima Electrical Division o Police department nungi ketdangsürtem aden.