Asenok tenüng & mapa

Nagaland ta asüba tenüng ya Nagalim agi melen nung koma süla (?) ta iba osangkaket nung taoba hopta tasüngdangba nung nisung aikati shilem agiba atema pelar. Iba jagi tanü Naga yimten tebilemtsü indang jembia aoba maparen nung asenok aikati temulung agüja shilem agidagi ta sayur. Yimten nung shilem agibaji tatar yimsüsür mesüra lenir akümbajiang masü mesüra ken o jembidak telok ka mesüra ka tenüng nung dena shilem agibaji dang masü saka kibok nung mesüra kong lidir liaka pei tebilemba aser tangatetba lemsatepa ola adokbaji tongtibang shilem ka asütsü. Talisa, tang ama Naga yimten tebilemtsü latettsü merangba mapang ka tangarbo amuia moui nükenbelema ken o tasak jembia shisalemsatepa senzüdang asenokibo kecha memetet, kecha mangu aser mangashi amato senotsü tajangzük angutsüba maparen mesüra kin kidong otsütem kija jembia kazüra, tangar tejakleni aodang asenok tesüleni aoba kuli aser tamaitsüji aji asütsü. Aji oda, alima ali tashi yimten alitsü aser yimten kübokjiang asenok alitsü asünungji, asenoka yimten ken o jembiba maparen nung pezüpezüa melii asenokia kechi bilemer aser kechi angatet, itemji akok tashi temai adoka Naga nungertem den jembitsüla. Tatishitsü agi, asüng Naga yimten tebilemtsü ken o India den NSCN-IM teloki lemtetba onük nung ” tang Nagaland ta jaa aliba state dang Nagalim ta ajatsü,” ta renemba ken o ka sangdong nung asenoki kechi ashitsü. Junger ta agizüktsü asü mesüra majunga ta longkak ait tenzüktsü. Iba ama mesük tongtibang yimten onüktem karbo telemtetba magidang aser matalokdang jembitsü, lemsateptsü aser nübortem tangatetba aser taginüba ken o ama metetdakja atatsü nüngdaker. Ibayongji, tang ama tensa nung, balaka, Ao kin ama kecha shisa mebuluibo melidaktsünüba agi shisaboludaktsütsü asoshi Naga yimten tebilemtsü dak aketba onük nung tasüngdangba balala asüngdanga shisalemsadaktsütsü meranger. Tang ama mapang ya Naga nunger asoshi yimten telemtetba tasen ka bener aruba agi Naga nunger rongnung mangatettep lendong madoktsüsa Aortemi jelia shisa tajung agüja atatsü nüngdaker. Aji oda, tang ama mapang ya asenoki Naga yimten tebilemtsü onükang tilaba aser asen kilong tebilemtsüang tuluba küma jembira, tangari asenok nüma reprangtsü aser Ao kin aküm samatsü. Kin süli, nisung süli aküm aketba ya angati anguba mapa ka masü. Meranga inyaker takok angu nungang, nüngsen aser lendong ajak tizükteta nokdaktet nungang, ken o shitak aser ochi jembi nungang aser shisatsü tajung agüja yari nungang kin süli, nisung süli aküm aketer. Ken o tasak jembiba nung madentsü, lendong aser timtem mapang jena aotsü, ochi mejembitsü aser kodanga teyari magütsütsü ta asüba kin aser nisungji shingaia aküm metsübutsü. Ibaji asenoki ajaki angateta lir, anungji tang ama Naga nunger yimten nung terata tia nung aliba mapang Aortemi Naga nunger rataa meyutsüi shisa tajung agüja ola adoktsüla. Nagalim ta asübaji Nagalima ta asüba o lir, anungji Nagaland agi Nagalim melenbaji English nungi Aoi meyiper asütsü. Ajisüaka, Nagaland agi Nagalim ta melenba ajanga Naga nunger rongnung mepetmesü aser mangatettep taliang adoktsüsa süra memelenang tajungba ta Ao kini shitettsüla. Ano, longjemtsü melen, tang aliba Nagaland agi ana kümba agi tajangzük masü saka takoksa aser lendongang ataloktsüsa reprangtetra, Ao kini Naga nunger state balala küma melemsai anosa külemi lia aotsü lenmang tajungba ka sayutetsüla. Naga nunger yimten nüjiso mangutsü temetet süra yimten nüjiso bushiba tenüng nung Naga nunger ojang timatemtsüsa Ao kini Naga nunger nem shisa agütsütettsüla. Aji oda, Nagaland, Assam, Arunachal, Manipur aser Myanmar kübok Naga nunger lushi alibatem ajak Naga yimten ka kübok alitsü tamakoktsü süra iba tenüng nung Naga nunger talangka timmatemtsüsa Ao kini Naga nungertem nem shisalen tajung ka sayutettsüla. Iba amaji Naga yimten tebilemtsü dak aketba onük tongtibangtem indang Aortemibo jembitsüla, angatettsüla aser telok ka tsütsü mesüra asenok atsünga masü saka Naga nunger ajak ajungtsüsa len shitak sayutettsüsa Tsüngrem dang shisatsü meshia Aortemi inyaktsüla.