Prangpong bener auyaba nung India nunger ka densem

Houston, July 11 (Agencies): Utah, US nung oset kar toktsür sen meshia agia atar, tesülen sen agia ataba meyiptsür külen oset agizüka bener aoba dokan ka aser restaurant ka nung prangpong bener auyaba ken o nung India nunger nisung ka densema lir, ta Hokolobar nü Federal Bureau of Investigation (FBI) ajanga metetdaktsü.
Salt Lake City, US Manmeet Singh Bhatia aser par medemer Marc Conrad Kammerman nati taküm May ita ‘Check City’ doken aser ‘The Smoke Shop’ restaurant ka nung prangpong amshia auyar ao.
Bodhbar nü obendangdak prangpong amashi tashyim agi auyar aoba ken o nung tenati aitsüogo, ta FBI sangdong ka ajanga metetdaktsü.
US nung India nungeri ochimashi sen rozükba, telung nung pei ajangzüktsü asoshi oset miima yokten-yokraba aser kibong nung raratepba dak alaka tashyim agi auyaba bo kanga aika mali.
India tsür nurse ka, lai mapa tamajung inyakba ajanga shiba dang “Bombshell Bandit” ta ajar, lai US nung bank aika nung tashyim agi auyaba ajanga tepuokdang küm pongu ayutsü asoshi taküm April ita nung obendang agütsü.
Arishi küm 24 tain, Sandeep Kaur-i yaküm California, Arizona aser Utah nung aliba bank kar nung tsübudaktsütsü asoshi la prangpong mali ser nung bena lir amai amokmerena shidi zülur auya-a liasü. Ajisüaka police temi la Utah nung arishi mesoba ajanga lai gariji 200 kmp nung anir ajen saka Arizona ajanger Nevada nung menepa apu.