Peren DC ajanga District Hospital ICU semzüktsü

Dimapur, Chiteni/July 22 (TYO): Deputy Commissioner, Peren, Vineet Kumar, IAS ajanga July 22, 2022 nü District Hospital, Peren Town nung ICU building tasenba semzükja liasü.

Iba sentong nung jembiba mapang Deputy Commissioner ajanga nüburtem dang district nung inyaksangshi balala junga aotsü aser terenlok alitsü atema sorkar den yariteptsü ayongzüka liasü.

ICU building tasenba ya district atema kisüng masü saka danga district tem asoshia teyari tulu alitsü, ta pai ashi.

Mapang shidak nung iba ki renemtetba atema Kumar-i Peren nung aliba nüburtem nem tenüngsang agütsü aser medical ketdangsür dang iba facility tajungtiba nung amshitsü ayongzüka liasü.

Principal Director, Health & Family Welfare ajanga iba sentong nung jembiba mapang, administrator aser ano danga telok balala lenirtemi ICU yangluba atema pelaba lemsatepa liasü.

President, PTWO & member, Construction Committee, Pelingrangle-i iba ICU yangluba osang tongmelang agi agütsü aser iba kisüba mapang arogo, lokti tentet balala aser kija-kibong temi tenla agütsüba atema pelaba lemsatepa liasü.

Iba ki yanglutsü atema nüburtemi tenla agütsüba sen ajak agi 19,34,721 liasü, ta lai metetdaktsü.

Iba sentong nung SDO(C) Kemciyile menden liasü aser Dy. CMO Peren aser President PTWCU & member, Construction Committee Gaigwang Hegeu nungeria jembia liasü.