BJP-i “Hallelujah!” “Praise the Lord” ayimba aitsür: DAABAPF

Dimapur, February 17, 2023 (TYO): “Haliluya” ta asüba ya Khristantemi onok Taküm Tsüngrem nem tenüngsang agütsüba lir anungji iba ya election nung amshitsü makok ta Dimapur Area Ao Baptist Pastors Fellowship (DAABAPF)-i metetdaktsüogo.

BJP candidate ka, BJP züngsemtem aser parnok pusemertemi iba olen amshiba khukhua aitsür ta DAABAPF-i sangdong ka nung ashi.

BJP candidate ka, ketdangpurtem aser tangartemi election sentong ka nung “Hallelujah! Praise the Lord!” ta ayimtenba video ka Hokolbarnü kanga prokshiogo.

“Tawa BJP pusemer kari ‘I have decided’ ken tensaba ajanga Khristantem temulung yirutsür lia ano BJP ketdangpurtem aser pusemertemi election nüboyimba sentong nung ‘Hallelujah! Praise the Lord!’ ta ayimtenba ajanga temulung tali yirutsüogo” ta DAABAPF President Temsu Jamir aser Secretary Mar Longkumer nati sangdong ka nung ashi.

“Dimapur Area Ao Baptist Pastor temi nenoki mashimemetetba tuteta sayur aser nenok dang tangatetba mashilen agi iba temeshi olen mamshitsü metetdaktsür. Ozü Taküm Tsüngrem nem tenüngsang agütsüba olen ya nenoki yimtenren alizüng atongtsü mechi nung mamshitsüla” ta DAABAPF ketdangpurtemisa ashi.

“BJP candidate tem aser BJP züngsemtemi tamangba yimsü indang ken aser olentem amshia public manisatsü metetdaktsür” ta DAABAPF-isa metetdaktsü.