Tejembir Masü, Teinyaker Kümang

– Mrs. R. Mapukala, Pongen, Merangmen Tzürangkong.

Küm pezü renteter pongububa mezüng election mongpo.
Candidate-temi Nagalima kinük pezü nungi tanganütsü yimyim,
Metsü ozü ola ama akümlirtemi angashir.
Mosai sina tenem nungi kanan li yongyaseta penzü medem,
Posü ozüi mesang süng tejang atang yongya ama ata nung,
Temelenshi kichia mangur meimchirtemi.
Lemang tajung yanglutsütsü… Naga lima nung mangura to!

Shisa liok tajungba melenshitsütsü…Tesayura tajemba dang,
Mozü ki tajung lapoktsütsü…Nashi ki den sako.
Zünger mapa mongui alir lanurtem mapa agütsütsü.
Sensaker chirnurbo tazüngba shidak liaka mapa mangur.
Minister, MLA chirnur, anükapang tashi Government mapa,
Takar, t ulur chirnurtem-ang office asüng.
Sensaker,ochishirtem koleni aotsü ? Nübortem asüktemer ani.

Election aongmedangbo jungrara… meshisadangi jembir masü na,
Ni atokra gate shibanga mayutsü… takar, sensaker ajak “WELCOME”
Saka küm pongo nung nübori nü tejak mangu.
Na vote aginüdangbo MEEM Sahib nünaprongla menürem jakden.
Atokerbo tilar,sensaker dakbo meranglok, ya kichi yimya !!
Na ajurutsü dang nungibo Yisu ajurutsüang temelaba aküm.
Vote aginüdangbo “SAN OLA” Tulur kümerbo molusongzü.

Takar,tulur den sensaker leni maor ajak temeyongbo kesa dang.
Saab-bai lajartembo mangur,yimti tulu nung yimsüsürbo metet.
Saka yimtsüng tila nung yimsüsürbo memetet.
Development ajak takar,tulur asoshi dang.
Naibo mangashira na !! Timtemertem anüngba olaji.
Hai!! Party workers tem, na yangko asüngtsü temerang.
Tulur o nübor na tsüngda na lensanir süang ma.

Tamaren lenir tajungtem, Declaration mapang o tajung aika tejembi.
Na vote aginüdang meinyaktettsü o aika tenangzük tongmelang süang.
Yimlibilema nübori kü nem nü ochi meyongnem agüjang ta shiang.
Teyazü tenangzükbatem mapang intoka nübor temesüzük.
Lakogo.. Teyazü ola osü, teyazü lenirbo jogo maginüra.
Ina !! Tsüngremi shimtetra, takoker rongnung tenra,
Naga lima asoshi lokti ajak ajungtsü terenlok mapa inyaka sayuang.
Süra nai ojang ishika dang jembiaka nübori na tushitsü.

Hai NAGA nunger! Tenok tenoka angangni…
Declaration mapang candidate kangabo tesang, anemsü o tejembi.
Sarasademjang, rongsen akaribo mapayui tenla-ang, sen temeshi.
Karibo küm pongu nung kichia meinyaktsü sür nung,
Pasa tajungba mapa tajung aika inyaktsüogo ta teshi.
Ochiba nungbo asangtsü tim, saka jakdaka teyazübo tepura.
Tajung inyakbatem yimjak nung shiang, masüba nung kanga tesangtep.
“Küm 5 sülen aseni shimtetba lenirji asangtsü asü masangtsü,ata-a lidi.”