AR-i tzü tank aser solar street light lemtsü

Dimapur, Rongchii/April 13 (TYO): HQ IGAR (N) kübok Assam Rifles Mon battalion-i, April12 nü Min district kübok L/Wamsa yimtsüng nung tzü tank aser Solar Street Light lemtsüogo.

Yimtsüng nung tzü aser electricity agi anüngba agi timtemba tebilemtsü bentettsütsü asoshi iba jenjang ya agiogo. Iba ajanga yimtsüng nung tanur taintem anogoshia tashi intoka tzü ataba nungi anisüngzük agütsütsü. Kasa mapang nung anonung timtem lendong ataloktsü aliba nungi jenbotsü atema Solar street lights-a agütsüogo.

Item osettem ya April 12 nü yimtsüng ketdangsürtem nem bendanga agütsüogo. Assam Rifles-i iba mapa tajung benoka inyakba atema yimdaklirtemi parnok dang kanga pelaba lemsatepogo.

Maneni Mon Battalion-isa, April 13 nü district kübok Nyanhu aser Longwa Wamsa nem tzü tank aser Solar Street Light agütsüogo.

Yimdaklirtem anogoshi anibelema tajemtsü tzü ataba nungi anisüngzük agütsütsü atema tzü tank agütsüogo aser lendong balala ataloktsü aliba nungi jenboa alitsü atema Solar street light tem agütsüogo.

Item osettem ya yimtsüng ana nungi ketdangsürtem nem April 13 nü bendanga agütsüogo. AR-i yimdaklir anisüngzükdaktsütsü atema tenla tajung agütsüba asoshi yimdaklirtemi kanga pelaba lemsatepogo.