MDMAA-i angati coaching camp ka ayonga agir

MDMAA-i Mokokchung nung ayonga agiba pei taküm kümzüka alitsü terenemshiba agütsüba sentong lapokba sentong nung Taekwondo shizükertemi Kata iya shilem agiba noksa nung angur. (Mokokchung, September 28)

Dimapur, September 28 (TYO): Mokokchung District Martial Art Association (MDMAA)-i tejangrartem nem pei taküm kümzüka alitsü aser pei taküm junga ayutsü terenemshiba sentong ka tan September ita 28 nü nungi taruba October ita 10 nü tashi Mokokchung kübok multipurpose sports complex nung agütsütsü tenzükogo.
“Mokokchung jila tenteter küm 125 ajungba nüngtem nung iba terenemshiba sentong ya agütsütsü lemtet,” ta MDMAA Tir, Alemyanger-i tanü sentong tenzükdang metetdaktsü.
Lanurtem ajungmesotsü aser parnoki tanü lokti merükteta ayutsü jangradaktsütsü nükjidong tulu nung iba sentong ya ayongzük ta pai ashi.
Paisa ashiba agi, “Teyakyak senso tajungtem anitetba ajanga asen lokti nung temelenshi tajung bener arutsütsü tangatetba yur tarutsü mapang nung lokti tentet tia tajungba kümdaktsütsü asoshi tanü süngjang tajung prokshitsü tenzüker lir.”
“MDMAA-i iba ama sentong tajung ayonga agiba atema kanga pelar. Ano, tebur aser tetsür naprongla densemba lanurtem rong nung martial art tasa balala shizüktsü tejangraba aliba ya kanga dang jangratemtsü ka lir,” ta tanü sentong nung tetushi tesemdanger, Col. Sudesh Bhanger, Commandant, 31 Assam Rifles-ia metetdaktsü.
Ano külen, MDMAA tesayurtemi Taek-wondo, Boxing, Kung-Fu, Karate aser Muay Thai nunger densema martial art tasa balala tan sentong nung shilem agirtem dang sayuba den külemi, MDMAA-i tawa Kohima nung ayonga agiba 28 buba Nagaland State Taekwondo Championship nung takok angurtem nem tetushi agüja liasü.
Tan sentong nung school balala nung azünger kaketshir 100 shi shilem agiba osang jangjaogo.