Nagaland nung School Safety indang maparen tenzüktsü

Kohima, June 9, 2023 (TYO): Hokolbarnü Nagaland State Disaster Management Authority (NSDMA), Department of School Education (DoSE) aser NagaEd tsüngda Nagaland Disaster Management School Safety Policy (NDMSSP) mapa tenzüktsü atema Service level Agreement nung sign sütepogo.

Iba tenangzüktep nung Commissioner & Secretary School Education Kevileno Angami, Commissioner & Secretary NSDMA Lhouchalie Viya aser NagaEd operations manager Marina Dzuvichu nungeri sign asü.

Iba mapang Joint CEO NSDMA Johnny Ruanggmei aser School Education Principal Director Thavaseelan K na liasü.

NDMSSP ya taküm December ita tesayurtem atema tenzüktsü. Nagaland nung sorkar aser nija school nungi tesayur 10000 tashi training agütsütsü alizüng lir aser iba ajanga school safety nung temelenshi tulu angutsü.

“Mezüngbuba shilem nung tesayur 5000 (sorkar 4000 & nija 1000) nem training agütsütsü” ta Assistant Manager (Training & Education) NSDMA Khrolou Koza Lohe-i ashi.

Shisaliok nung school safety ya kanga dang tongtipang shilem ka lir aser iba nung alima lendong balala, lendongtsüdong, tanur dak tashiyim mapa inyakba, merenshiba, ozüng alema inyaksangshiba aser menatepba tashidak tayongzükbatem dena lir, ta Lohe-i ashi.

Item tebilemtsütem asoshi NSDMA-i School Safety Policy ka yanglu aser iba nung Nagaland nung aliba school tem asoshi guidelines & procedures dena lir, ta laisa ashi.

Kaketshirtem aser staff asoshi NSDMA, DSE aser NagaEd-i School Safety Policy digitize asütsü mapatong ka tenzüker, ta Lohe-isa shisem.

Iba tenangzükba ya tesayurtem nem online mode ajanga disaster management atema training agütsütsü aser pei pei school safety plan yangluba nung yariteptsü atema agir, ta laisa metetdaktsü.

NagaEd-i digital compliance module renemtsü aser amshiyim atema technical support agütsütsü, ta Lohe-isa ashi.

Iba course nung NSDMA-i senotsü teyari agütsüba den facilitator aser interlocutor ama inyaktsü aser Department of School Education-i training atema tesayurtem tenüng agütsütsü aser certificate courses atema mapa inyaktsü ta laisa metetdaktsü.

“Iba tesentaktep ajanga school safety nung temelenshi tajung angutsü amanger” ta NSDMA nung Joint CEO Johnny Ruangmei-ia ashi.

“NSDMA aser DoSE den külemi school aser kaketshirtem kümzüka ayutsü maparen inyaktsü sendaktepa atema pelar” ta NagaEd Founder Kevisato Sanyu-ia metetdaktsü.