MP nung nisung kati tribal ka dak natzü naloktsüba sülen police-i puogo

Bhopal, July 05 (Agencies): Madhya Pradesh nung nisung kati tribal aayanger ka dak natzü naloktsüba sülen Mongolbar aonung police-i aibelensangji puogo.

Pravesh Shukla-i tribal lanur aayanger ka dak natzü naloktsü; National Security Act (NSA) kübok pa nem temerenshi tulu agütsütsü. State administration-isa Shukla’er ki shilem kar bendoktsüogo, kechiyong pai ozüng alema ali rakzüka ki asü, ta osang ka ajanga metetdaktsü.

Shukla-i nisung ka dak natzü naloktsüba video ka Mongolbarnü social media nung prokshiba sülen police-i pa anema ken o benoka liasü. Bodhbarnü ketdangsertem aser police-i JCB amshia Pravesh Shukla’er ki shilem kar bendoktsüogo.

Madhya Pradesh Chief Minister, Shivraj Singh Chouhan indang office-i twitter ajanga, “Pa anema NSA benokogo, bulldozer amshia ki bendoktsüogo aser nüngdakra aibelenertemji ali telung süklep (10) nung remtsütsü. Madhya Pradesh nungbo tamajung inyaktsü bilema alirtemi ozüng alema meinyakdang tamasa 10 ben bilemdangtsüla,” ta metetdaktsü.

Madhya Pradesh nung BJP-i iba tatalokba bushisüngdangtsü atema nisung teri akümba committee ka tentetogo, ta MP BJP Tir V D Sharma-i metetdaktsü.

State nung opposition Congress-i iba tatalokba bushisüngdangtsü atema CBI nem agütsütsüla aser aibelensanger ki bendoktsütsüla, ta takhangba agütsü.

Bahujan Samaj Party (BSP) Tir, Mayawati-ia iba tatalokba ya taaktsüka lir, ta shia tai tonglokja alisanger kiji bendoktsütsüla, ta takhangba agütsü.

Osangbener den jembidang state Home Minister aser sorkar otongdar, Narottam Mishra-i, “Bulldozer amshia ki bendoktsübaji Congress-i akhangba agi masü saka ozüng alema ali atsünga agiba agi bendoktsüba lir, ta metetdaktsü.

Congress party-i, natzü naloktsüsangji BJP den tesendaktep lir ta aitsür, ajisüaka BJP-ibo aibelensangji party den sendaktepa mali, ta shiogo.