Azü shi achitsü mesüra machitsü ya pei molung: RPP

Dimapur, Yimpoksüi/Nov. 07 (TYO): Home Minister Amit Shah-i India nung nashi shi ayokba nokdangtsü asoshi pa tangatetba benokdang kin aikati anema nokdak aser magizük.

Naga nungeri azüshi achiba ya sobaliba nung shilem ka aser iba atema aka bilemtsü mali, ta anthropologist aser Naga Hills of Assam nung British Raj Administrator, J.H. Hutton-i zülua lir. Naga nunger timbai azü shi achir aser asen state nem “The land of dog meat eaters” ta tenüng jalokja lir, anungji kecha masü, ta Rising People’s Party (RPP) ajanga November 6, 2023 sangdong ka nung ashi.

Tanü pei sasa tentetba lokti tentet, talisa Maneka Gandhi-i aniba People for Animals ajanga Naga nunger madak par tangatetba mapa kuma amshitsü meranger. Nashi shi nokdangtsüba atema süang mesüra azü shi nokdangtsüba atema süang, item ya India nunger yimtenren aser sobaliba tsütsü ‘ideological battle’ nung shilem ka ta The People for Animals, Nagaland Chapter-i angatettsüla aser parnok item sülen manishitsüla mesüra parnok nem manishidaktsütsüla, ta RPP sangdong ajanga ashi.

Tanü kanga kera/mela mesüzükdaktsüba Naga nunger temi anir People for Animals, Nagaland Chapter yagi Delhi nung par kibur tebilemba mangateti state nung azü shi nokdangtsü kanga jangrar, ta ashi.

Iba ken o ya tila masü ta Naga nunger temi angatettsüla. Ibai “One nation, One Culture” agenda nung shilem ka lir aser Bharat telungzük nung kin tilatem aser sobaliba ajunga ‘Sanskritize” asütsü nükjidong lir, ta RPP ajanga ashi.

Court dangi aotsü melena People for Animals, Nagaland Chapter yagi Indian Parliament nung legislation agizüktsü asoshi Maneka Gandhi mesüzüktsüla. RPP ya junga yimsü asütsüba nung rangloker lir, saka “Identity Politics” ya senzüka yutsüra lendong tulu lir, ta sangdong ajanga ashi.