Mokokchung nung Swachh Bharat mapatong tashi itshir

Dimapur, September 29 (TYO): Centre sorkari tenzükba Swachh Bharat mapatong tali tashi itshidaktsütsü nükjidong nung Water & Sanitation Support Organization (WSSO) PHED Nagaland-i SBM kübok linük ajunga merüktettsü mapatong ka Longkumer Kilem, Mokokchung nung tanü Mongolbar nü tenzüktsüogo.
“Swachh Bharat Mission ya tanga mapatong ama masü anungji, senso shiai pei benokba mapa takok angutsü asoshi bendanga agüja inyaktsüla,” ta tanü sentong nung tetushi süa jaoker, ADC Mokokchung, Bendanglila-i sentepa alirtem ayongzük.
WATSAN luden-i nüburtem talisa, yimdak yimtsüng nung alir dang merükmejua alitsü aser jana junga indoktsü tesayuba agütsütsü tajungshiba olen ka lai metetdaktsü.
“Merükmejua alitsüji pei temang aser ki merüka ayuba dang masü saka asen alidak lipoküm ajunga anepaluba densema lir,” ta laisa shisem.