Lok Sabha election nung VVPATs ajak azüngtsü Congress-i akhanger

New Delhi, March 15 (Agencies): Lok Sabha election agitsü joko mapang ana nung lia Congress party-i Voter verifiable paper audit trail (VVPAT) ajak azüngtsü takhangba agütsü.

Hokolbarnü Congress Tir, Mallikarjun Kharge-i, vote azüngba mapang nung Voter verifiable paper audit trail (VVPAT)-a ajak azüngtsüla, ta metetdaktsü.

Tawa Congress lenir Rahul Gandhi-i, taruba election nung EVMs (Electronic Voting Machines) masü saka ballot papers amshitsü nüburtemi akhanger, ta jembiba dak sendakba nung osangbenertemi asüngdangba ka langzüdang Kharge-i, “Tetenzük nungi iba ya onok takhangba lir. VVPAT ajak azüngtsüla, ibaji onok takhangba,” ta ashi.

“Nenoki VVPATs kar dang azünger, saka onoki VVPAT ajak azüngtsüla ta akhanger. Ibaji melamela metettsü aser iba nungji sen aika meindoktsü,” ta pai ashi. VVPAT ya independent system ka lir aser iba ya EVMs den sendaktepa dang lir, koba ajanga vote agütsürtemi parnoki agütsüba vote ji reprangshitettsü.

Vote agütsüba mapang nung serial number, tenüng aser candidate indang temaitsü keta aliba slip ka ajenzüker aser second tenet shi transparent window nung sayuba sülen ajenzükba slip ji pasasa mejepzüker VVPAT nung aliba sealed drop box nung tsüker.