Taremzük agi angazükba

Kü adianutem, kodang nenoki tatitang aika angur, nenok tamang atitangba agi taremzük adokdaktsür, ta metetta aji kanga tepelatsü ta züngshiang. Aser nenok kecha nunga manüngi teperi aser tabensa akümtsü asoshi, iba taremzükbaji pei mapa teperi südakjang.  Yakob 1:2-4

Asenok taküm nung tetentangba indang tongtipang osang ka agütsür. Tamanger dangi tatitang aruba ajakji Tsüngrem temelaba nung arur. Tsüngrem temetetbaji shingai paidoktsü makok. Pai pa nübur dang inyakba Laishiba ajanga asenoki anguba ama asenok dangi aruba tatitangji Tsüngremi meteta lir ta asenoki agizüktsüla. Yakobi ashibaji tamakoktsü amai bilemer: asenok dangi tatitang aruba nung pelaang. Tepela aser tatitangji tamamangtsü ka ama bilemer. Asenok pelaa lira tatitang malitsü ama asenoki bilemer. Saka kasa taküm ka nung kasaji alitsü ta Tsüngremi ashir.

Kodang asen taküm nung Tsüngremi anishiba agizükdir, iba yagi tetsübu aser mejangjaba nungi kümzüker aser tasü itdaktsur, aser “temoatsütem züngdangtsü” tasü itdaktsür. Ibai tajungshiba ka dang masü, saka ozüng ka lir. Ano ozüng jagi tatitangba nükjidong aser iba nungi adokba metettsü ashir. Tatitangbaji tejangja kulitem asoshi yoker. Tatitangba marudang tama Tsüngrem sendong tejangjang ashiba angur.

Asenok atitangbaji tabensa aser terenem kümdaktsütsü Tsüngrem nükjidong lir. Temenen makai tabensa akümtsü indang o jagi mashir, saka tain kümdaktsütsü indang ashir. Kibuba Yisu Khrista tabensa lir! Kü lemang nung tatitangba arudang iba nungi angazükdang Pa taküm kü dak ainer. Tatitang aruba shia ni Tsüngrem dang nai kü dangi tatitang yokba asoshi “ne tenüng asanger” ta shitettsü asü ? Ni tain kümdaktsütsü asoshi pai ya yoker ta angatetra ni “ne tenüng” asanger ta shitettsü. Pa sentongji tabensa tetentangbatem lir ta ni angatettsüla aser amangtsüla, koba agi ni ainba peria kümdaktsür. Kü teyari ajak ni Khrista nung angur aser idakji meperiba mali ta tatembangji südaktsütsüla.

Kü teinyaktsü peria indaktsütsü asoshi taremzüki kü taküm nung mapa inyakdaktsütsü. Tanur ka taremzük den masor saka tsüraburi angazükdakja indaktsür. Idangji pai shidakba taremzükji sayutettsü. Aji oda asü nung dang pai shidakba taremzükji sayutettsü. Kü Tsüngremi tatitang aser tetentangba ajanga angazükdaktsütsü ni bushir. Ni itemji agizükdaktsütsü ni bushir. Ni itemji agizüka aser kü taremzük asütsü amshidang ni tashi itta akümer, aser Yisü mesük akümer.

Oba, kü taküm ajunga anguba asoshi ne tenüng asanger. Ni angazükba nung ni ne dak amanger, anungji nai ni shimba asoshi pelar.