India nung küm shia peri mechiba ajanga nisung 50,000 asür

New Delhi, July 29 (Agencies): India nung küm shia nisung 50,000 shibo peri mechiba agi asür, aser alima nung peri mechiba agi nisung teimtiba asüba linükji India lir, ta Hombarnü BJP MP Rajiv Pratap Rudy-i metetdaktsü.

Lok Sabha senden nung kanga tongtibang onüktem benoka o lemtepba mapang nung Saran nungi BJP MP, Rudy-i, küm shia India tesem balala nung nisung lakh 30-40 shi peri mechir, aser iba nungjagi nisung 50,000 shi asür, ta metetdaktsü.

Paisa, peri mechiba ajanga nisung asütsü alibaji nokdangtettsü, peri mechiba kanga bulua atalokba ya climate change den sendaktepa lir, ta ashi.

Lok Sabha senden nungsa Vellore nungi MP, M Kathir Anand-i beedi yanglurtem, talisa tetsürtemi timtem tulu ajangshiba osang metetdaktsü.

Anand-i Centre sorkar dang beedi yanglur arrshi küm 60 ser temapurtem nem pension agütsütsüla, ta mepishi.

Kanyakumari nungi MP, Vijay Vasanth sorkar dang medical treatment mapang sen teindokba ajak sorkari agütsütsü atema Ayushman Bharat scheme ya reprangshitsüla, ta ashi.

Bathinda nungi MP, Harsimrat Kaur-i, Punjab nung Integrated Child Development Scheme (ICDS) supplementary nutrition programme nung ochimashi tulu lir, kechiyong teyari angutsü temsüa malir aikati nija teloktem ajanga teyari agir, ta ashi.

Laisa, iba tatalokbatem bushisüngdangtsü atema Central Bureau of Investigation (CBI) nem agütsütsüla, ta metetdaktsü.

Tamil Nadu kübok Karur nungi MP, S Jothimani-i National Eligibility cum Entrance Test (NEET) aija, “Question paper alizüktsü atema sen lakh 25 shi alirtemi dang NEET tatidang nung takok angutsü ta onoki bilemer. Iba tatidang ajanga loktiliba aser rongsenketzüng tsütsü nüburtem bendanger,” ta ashi.

Laisa, Tamlil Nadu nung kaketshir 18 bo NEET tatidang ajanga soseta süogo, anungji NEET ya agientsüla, ta takhangba agütsü.

Godda nungi MP, Nishikant Dubey-i, ozüng alema aruba Bangladesh nungertem ajanga Advivasi nunger temedentem agiadoker, ta metetdaktsü.

Dubey-isa, “Jharkhand nung Adivasi nungertemi longkak aittsü meranger, kechiyong parnok temedentem Bangladeshi nungertemi agiadokogo,” ta ashi.