Olympics: Bhaker, Sarabjot na Bronze Medal asaya atema qualify süogo

Chiteni/July 29, 2024 (Agencies): Paris Olympics 2024 nung otsü tasen ka yangluba sülen anogo ka lir shooter Manu Bhaker, 10m Air Pistol mixed team event nung teammate Sarabjot Singh den bronze medal asaya atema qualify süogo.

Qualifying nung point 580 anguba sülen tena bronze medal asaya atema qualify süogo. Tena Korea nunger tarep Xue Li aser Wonho Lee na den Mongolbarnü asayatsü. Xue Li aser Wonho Lee nati qualifying nung point 579 ngua liasü.

Kasa asaya nung India nunger tarep Rhythm Sangwan saer Arjun Singh Cheema nata asaya, Tenati point 576 ngua jenjang 10buba nung tembanga liasü.

10 M Air Pistol Mixed event nung bronze medal atema asayatsü asoshi qualify asüba sülen Manu Bhaker ano iba asayamung nung medal tanabuba angutsü maongka lir. Lai tetsür 10m Air Pistol event nung bronze medal ka nguogo.

Kasa asaya nung Turkey team nung Sevval Ilayda Tarhan aser Yusuf Dikec nati point 582 ngua taoba mapang Olympic nung qualification round nung otsü tasen yanglur aliba den kasa kümogo. Tena gold medal atema Serbia nunger tarep Zorona Arunovic aser Damir Mikec na den asayatsü.

Deobarnü Manu Bhaker ya India tsürtem rongnungi Olympic nung medal ka anguba mezüngbuba asayar aküm. Lai tetsür 10m air pistol asaya nung bronze medal ngua liasü. Iba  medal ya India nunger asayartemi küm 12 sülen shooting asaya nung mezüngbuba medal anguba aser taküm Olympics nung mezüngbuba medal anguba liasü.

Kasa asayamung nung India tsür Ramita Jindal tetsür 10m Air Rifle shooting event nung tenetbuba nung tembangba sülen tsüka liasü. Arishi küm 20 tain asayar yagi point 145.3 ngua liasü. La mapang ka nungbo pezübuba nung liasü saka iba sülen junga masayateti tamakok angu.

Iba asaya nung South Korea tsür Ban Hyojin-i point 251.8 ngua gold medal angu aser China tsür Huang Yuting-i silver aser Switzerland tsür Gogniat Audrey-i bronze medal ngua liasü.