Ao Senden-i IMDH nung Doctors/Medical Officers peria ayutsü tuyur

Dimapur, July 29, 2024 (TYO): Ao Senden-i Department of Health & Family Welfare dang Imkongliba Memorial District Hospital, Mokokchung nung Doctors/Medical Officers peria ayutsü atema shidi ka züluogo.

Ao Senden-i Chief Medical Officer Mokokchung ajanga iba shidi ka zülu aser Department dang tawa Medical Officers kar IMDH nungi mapa belenba atema temelenertem yoktsü tetuyuba agütsüogo. Imkongliba Memorial District Hospital ajanga Mokokchung district nung alirtem dang masü saka meketa aliba district tem nungi nübortem anepalur, ta Ao Senden-i ashi.

July 17, 2024 nü Health & Family Welfare Department kübok Medical/Dental Officers transfers &  postings serial No. 45 nung Dr. Epibeni L Humtsoe, Jr. Splt., IMDH Mokokchung melenzüker shinga mali Wokha-i mapa belenogo. Ano serial No. 68 nung Dr. Martula Lemtur, Jr. Splt., IMDH Mokokchung melenzüker shinga mali DPO (CD-I) Mokokchung aser serial No. 82. Dr. Sutsungkokla Imchen, Jr. Specialist, IMDH, Mokokchung melenzüker shinga mali Dimapur-i mapatem belenogo.

“IMDH nung tang Doctors/ Medical Officers peria maliba mapang ka temelenzüker shinga mali par asem IMDH nungi anir ogo. Iba ya Mokokchung aser temeket aliba district nung alirtem atema kanga majung anungji temalen shia aliba Medical Officers temelenzüker meyok tashi Ao Senden-i parnok IMDH nungi aotsü memelatsü” ta Ao Senden President Marsanen Imsong aser General Secretary Imtipokyim nati shidi nung shia lir.