School Education ketdangsür aika dak akhümket mali kümogo

Kohima, October 25, 2024 (TYO): Department nung ketdangsürtemi ‘dignity of service’ bener arutsüla aser iba ajanga Nagaland nung education system ajunga melenshitettsü ta School Education and SCERT Advisor Kekhrielhoulie Yhome-i ashi.

Nagaland School Education Administrative Officers’ Association (NSEAOA) indang 15 buba general conference nung Yhome-i iba tayongzükba agütsü.

“Nenoki department tenzüktsüba nung temulung agütsütsüla. Asen department nung staff aika dak akhümket mali kümogo anungji asenoki kija shia dangi akhümket bener arutsü atema inyaktsüla. Department ketdangsürtemi kati ka angatettsüla” ta pai ashi.

Department nung administrative officers-i mapa shitak meinyakba ajanga ketdangsübaren kanga majung kümogo. Tanü directorate nung file ka agüja mapa inyaktsübaji kangasa majung kümogo. Tanü asenok ajak longjemer inyaker aser asenoki ajaki shisatsü agütsüteper. Department ketdangsürtem rongnung rara anentsüla” ta Advisor Yhome-i ashi.

“District kar nung civil administration-i DEOs, SDEOs aser AEOs madak ketdangsütsü atema department-i executive decision ka agiogo kechiyong mapa tazüng aika lir” ta paisa ashi.

“Asenoki meilungi three tiers- DEO, SDEO aser AEOs yangertsüla kechiyong district nung parnok ya tongtiret lir” ta Yhome-isa ashi.

“Directorate nung inyaksangshi ajak melentsüla aser iba atema administrative officers-i amalitep alitsüla. State sorkari Nagaland Education Administrative Service tenzüker aser Nagaland Education Service kübok adentsü. Iba atema NSSB aser NPSC rejutemi mapa inyaker” ta pai metetdaktsü.

“Asen tanurtem nem iba mapa tamajung magizükdaktsütsüla. Asenok ajak külemi shisadanga tebenja inyakyim ya agientsü merangdi” ta Advisor Yhome-isa ayongzük.

“Nagaland education system yanglushitsü atema taküm school 100 jungnüa shibangtsü. Onoki school tem ya tajangzük aketba aser inyakyim shitak inyakdak kümdaktsünür” ta pai ashi.

 “Department-i taruba küm asem-pezü ka tsüngda school 450 shi shibangtsü saka higher secondary schools talila lapoktsü” ta Yhome-isa shisem.

“Education, school/education administrators indang wadang ya architects ama lir. Parnok ya maparen ketdangsüba dang masü saka kaketshirtem tamendakdak yangertsürtem lir” ta Commissioner & Secretary School Education, Kevileno Angami-ia ashi.

“Department nung administrative officers-i kanga junga lenitsüla aser telemtetba shitak agitsüla. Nenoki inclusive school/office team work sobaliba tentettsüla aser mapang shia inspections asüba den staff dak tenük yoktsüla” ta lai ashi.

“Elementary aser secondary schools mesüra higher secondary education nung education administrators ajanga shisaliok wadang yangluba nung tongti shilem agir” ta Kevileno-isa ashi.

“Department nung mapa inyaker telemsa aika lir saka teachers recruitment policy shitak maliba ajanga service regularization nung timtem ajurur” ta NSEAOA president aser Assistant Director School Education, N. Thungchio Shitire-ia ashi.

“Universalization of Elementary Education (2001-02) atema SSA aser Secondary Education (2009-10) atema RMSA amala maparen ajanga Teachers recruitment policies nung tetsükdaktsü bentsür arur aser iba ajanga service management aser infrastructure providence nung timtem ajurur” ta Thungchio-isa ashi.

SSA aser RMSA ajanga 2011 küm nungi State Teacher sanctioned posts nung retirement aser promotion vacancies inyakyim anenadok, ta paisa ashi.

Department-i School Manual ka adoktsüla aser iba ajanga tesayurtem aser department len anitsü ta Thungchio-isa tebilemba ka lemsatep.

Iba sentong nung KABA Associate Pastor Dr Imsutoshi Lemtur-i temoatsü meshia sarasadem aser SDEO & Vice President Y. Mughaho Zhimo-i anküp tepela o jembi.