Lisopur aluyimertem atema ‘trade agency’ ka lapok

Dimapur, July 11 (TYO) : Lisopur aluyimertemi tsünütetba yokdoktsü atema Honibarnü Chumukedima daily market nung Naga Agro & Allied Products Trade Agency (NAAPTA) lapokogo.

Tanü Chumukedima EAC, Thungbemo Patton matsüngdang NAAPTA tenzükogo.

Nagaland atema inter-state Agri & Horti wholesale market ka dang lir aser ibaji Murgi Patti, Dimapur nung lir, saka iba shishilembadak tiyongtsü nung inyaker kari tim mesüi inyakba ajanga lisopur aluyimertem takoksa ajurur.

“Lisopur aluyimertem Murgi Patti nung teti ashioktsür aser ibaji ajanga parnok yaritsü atema Agency ka tenzüktsü atema tebilemba lemsatepa aru,” ta NAAPTA züngsem kati osangbener dang ashi.

Talisa, July 1, 2015 nü Murgi Patti nung Naga nunger aluyimer ka dak teka sangshiba sülen whole sale market nung Naga nunger entrepreneur temia shilem agitsüsa trade agency ka tekaratiba nung lapoktsü nüngdak ta parnoki ajitet.

NAAPTA nung züngsemtem rongnung entrepreneur aser khuret abenba sensotem densema lir aser parnoki Nagaland aser tanga state tem nung shishilembaba dak sendakba maparen shisadangtsü aser iba sülen aluyimertemi timtem kecha melii aonsotsütem yokdoktsü atema yaritsü, ta paisa shisem.

Tesem balala nungi bener aruba aonsotsütem bendena yokdoktsü atema Hotel Tragopan, Dimapur anasa Tenyimi Complex nung Godown ka renemogo.