Kiphire DPDB-i ‘Shiksha Sathi’ amenokogo

Dimapur, Metsüremi/March 15 (TYO): Itashia amenba Kiphire District Planning & Development Board senden March 15 nü DC Kiphire, Temsuwati Longkumer lenisüba nung menogo.

Senden nung ‘Shiksha Sathi (Education Companion) sentong amenokogo, koba kati ka nungi angazükteptsü aser len sayutsü asoshi academically tashi ita aliba kaketshirtem den tashi maitertem reptepja, academic performance, conference tajungba kümdaktsütsü aser Kiphire district nung maongka peria manguba tetsür kaketshirtem anidentsü nükjidong nung amenokogo.

Senden nungsa züngsemtemi, college nung azüngertem ajangzükdaktsütsü atema District Skills Development Committee den longjemer inyaktsü benokba sensaksema liasü. Iba dak sendakba nung Zisaji Presidency College Principal dang ken o dak sendaka aliba department tem den longjemer seminar ka ayongzüka agitsü tetuyuba agüja liasü. Taoba senden indang minutes lepa reprangshiba mapang board züngsemtemi Amahator EAC office building yanglutsü benokba indang sensak asem aser ken o ya ketdangsürtem dangi abentsü telemtetba agia liasü.

Senden nung DC Kiphire-i, Officers’ Club, Kiphire-i ayongzükba 3buba Interdepartmental Sports Meet 2025 nung takok angurtem nem sempet lemja liasü.