NE nung Central sepaitem yokba ajemnür: Rajnath Singh

July 11, 2015 nü Guwahati nung Union Home Minister, Rajnath Singh-i North Eastern State 8 nungi Chief Minister tem senden len ania agidang tangokba noksa angur. Noksa nungsa Minister of State for Development of North Eastern Region (I/C), Prime Minister’s Office, Personnel, Public Grievances & Pensions, Department of Atomic Energy, Department of Space, Dr. Jitendra Singh aser Minister of State for Home Affairs, Kiren Rijiju na angur.

Guwahati, July 11 (Agencies): Tanü Guwahati nung North-east state tem nungi chief minister tem den security senden nung jembidang Union Home Minister, Rajnath Singh-i NE nung tensa tajungba akümba yong tesem nung central security sepaitem yokba ajemnür, ta ashi.

NE nung security dak sentakba aser terenlok onüktem jembidang Singh-i, “Security tensa tajungba reprangteta, tesem nung security sepai yoka aliba reprangshitsü nüngdaker. Tamalen telungpur rara tamajungtiba aliba mapang yoka aliba (sepai) dang nungi tang aliba sepai timba lir,” ta ashi.

Arishi küm 64 Singh-isa chief minister temi terenlok asoshi nendaka inyakba ajanga tesem nung telungpur rara ‘taoba mapangtem nungi tajemtiba jenjang’ tashi aluogo ta tenüngsang agütsü.

Union minister-i, “Mizoram, Tripura, Assam tesem tulu ka, Meghalaya aser Arunachal Pradesh nung eastern district asem dak alaka telungpur rara mali. Nagaland aser Manipur na nunga yimjung kanga aginüa lir,” ta ashi.

Singh-isa, “Iba tesem nung nüburtem telungpur rara ajanga mapang talangka timtema aruogo. Tangbo parnoki yimjung indang süngjang arohtsüla. Rara ajanga temzüng alema aibelenba asoshi obendangba inyakyim mejungi kongshiogo,” ta ashi.

Security tensa repangshimtsü asoshi tentetba committee-i kobi melii osang agütsütsü imlar, ta paisa ashi.

Iba committee nung tekolakji security mongin RN Ravi lir aser tesüiba ita ishika tsüngda pai Northeast nung tesem aika semdangogo.

Taoba ita telungpurtemi Manipur, Chandel district nung sepaitem amakba ajanga tesem nung sorkari yimjung asoshi inyakba nung tetsükdaktsü alua liasü.